जन्मदिन फेरि फर्केर आएछौ
अहिलेभन्दा पहिले
र, बारम्बार सोधिरहन्छौ
मलाई बुझ्ने भएदेखि
अहिलेसम्म के के गरिस् ?
कहाँ कहाँ गइस् ?
क, ख पढेको स्कुल सम्झेको छस् ?
क, ख चिनाउनेलाई सम्झेको छस् ?
तैले क—कस्ता साथी बनाइस् ?
तँ हिँडेको बाटो त ठीक छ ?
तँ आफैंसँग मपाई नगर है
अनुहार ऐनामा हेर्ने गर है
जन्मदिन मलाई सम्झाइरहन्छ ।
तँ त पञ्चायतमा जन्मिस्
प्रजातन्त्रमा हुर्किस्
गणतन्त्रको उर्वरमा दौडेको छस्
तेरा गणतन्त्रवादीहरू के गर्दैछन् ?
भाषणमात्रै गर्छन् कि ?
रासन पनि आयस्रोतले थेग्ने दिन्छन् ?
सोध्ने गर्नु समयमै
समय घर्केपछि त के गर्नु ?
तापनि साक्षी किनारामा मात्र बस्लास् नि !
जन्मदिन मलाई सम्झाइरहन्छ ।
मैले भने
नागरिकको कर्तव्य पालन गर्छु
क्षमताले भ्याउने काम गर्छु
अर्काको बहकाउमा हिँड्दिनँ
जनप्रतिनिधिको विकासप्रेम आस गर्छु
राष्ट्रसेवकलाई त्यति धेरै चिन्दिनँ
नेपालीमाथि हेपाइसो छ
सहयोगका नाममा धर्मले थिच्दो छ
पैसाले सबैलाई किनेको छ
मूलबाटोमा पैसा छैन
चोर बाटोमा हाक्काहाक्की छ
म यति भन्छु यो साल
बाँकी अर्को साल भनौंला ।
जन्मदिन अब प्रश्न नगर
यो साल यति ।
सबैको शुभकामना प्रेमिल बनोस्
मनमनमा मायाप्रेम छाइरहोस्
बिदा मागे जन्मदिनसँग
बिदा मागें– सबैसँग जय होस् ।
प्रतिक्रिया दिनुहोस !
