पूजा गर्न घर बाहिर निस्किएकी वृद्धाको जंगली हात्तीको आक्रमणबाट मृत्यु

झापा : झापामा जङ्गली हात्तीको आक्रमणबाट एक वृद्धाको मृत्यु भएको छ । हात्तीको आक्रमणबाट मेचीनगर नगरपालिका–१० महानन्द टोलकी ८० वर्षीया पन्नादेवी साहको मृत्यु भएको जिल्ला प्रहरी कार्यालय झापाले जनाएको छ । 

भारत सिलिगुडी घर भई हाल उनी मेचीनगरमा  ज्वाइँ बैजनाथ साहसँगै बस्दै आएकी थिइन् । सोमबार बिहान सवा ५ बजे वृद्धा साह पूजा गर्न घर बाहिर निस्केको बेलामा मागुरमाडी जङ्गलबाट निस्केको हात्तीले उनलाई आक्रमण गरेको हो । आक्रमणबाट उनको घटनास्थलमै मृत्यु भएको प्रहरीले जनाएको छ । शवको कानुनी प्रक्रिया पूरा गरी पोस्टमार्टमको लागि भद्रपुरस्थित प्रादेशिक अस्पताल पठाउने प्रहरीले जनाएको छ ।

त्यस्तै, हात्तीको आक्रमणबाट बुद्वशान्ति गाउँपालिका–५ धिमाल गाउँकी ३८ वर्षीया कमला धिमाल घाइते भएकी छन् । उनलाई उपचारको लागि बिर्तामोडस्थित बिर्तासिटी अस्पतालमा लगिएको छ । साहलाई आक्रमण गरेपछि सोही हात्ती आक्रामक भई उत्तरतिर लागेको र सोही क्रममा चिया श्रमिक धिमालमाथि जाइलागेको प्रहरीले जनाएको छ।  

मेचीनगर– ९ बस्ने हेमन्त प्रसाईँको बुद्धशान्ति- ५ स्थित चिया बगानमा काम गर्न जाने क्रममा धिमाललाई बाटोमै जङ्गली हात्तीले सुँडले हानी घाइते बनाएको हो । घाइतेको अवस्था मध्यम रहेको जिल्ला प्रहरी कार्यालयले जनाएको छ ।