विराटनगर : घाँसको भारीले थिचेर मोरङको केराबारीमा सोमबार बिहान एकजनाको मृत्यु भएको छ । केराबारी गाउँपालिका-९ देवीझोडाका ५६ वर्षीय गणेशप्रसाद सुवेदीको मृत्यु भएको हो । प्रहरीका अनुसार आफ्नै खेतमा घाँस काटेर फर्किने क्रममा बिहान ७ बजेतिर घाँसको भारीले थिचेर बेहोस भएको अवस्थामा सुवेदीलाई फेला पारिएको थियो ।
चिप्लिएर लडेपछि उठ्न नसक्दा उनलाई भारीले थिचेको हुनसक्ने अनुमान प्रहरीको छ । स्थानीयले उद्दार गरेर बेहोस अवस्थामा उपचारका लागि विराटनगरको नोबेल शिक्षण अस्पताल ल्याएका थिए । अस्पताल ल्याउनसाथ चिकित्सकले मृत घोषित गरेको प्रहरीले जनाएको छ ।
शव पोस्टमार्टमका लागि कोसी अस्पताल ल्याइएको छ । मोरङ प्रहरीका प्रवक्ता डीएसपी रन्जनकुमार दाहालले घटनाको अनसन्धान सुरु गरिएको जानकारी दिए ।
प्रतिक्रिया दिनुहोस !
