कोसी प्रदेश मन्त्रिपरिषद् बैठक : निजामती किताबखाना स्थापनाको प्रक्रिया अघि बढाइने

विराटनगर : कोसी प्रदेशको मन्त्रिपरिषद् बैठकले विभिन्न चारवटा निर्णय गरेको छ । मुख्यमन्त्री उद्धव थापाको अध्यक्षतामा सोमबार दिउँसो बैठक बसेको हो । विराटनगरस्थित मुख्यमन्त्री तथा मन्त्रिपरिषद्को कार्यालयमा सम्पन्न बैठकले प्रदेश र स्थानीय तहका कर्मचारीहरूका लागि निजामती किताबखाना स्थापना गर्ने निर्णय गरेको छ । 

लोकसेवा आयोगको परामर्शमा किताबखाना स्थापनाको प्रक्रिया अघि बढाउने निर्णय भएको प्रदेश सरकारका प्रवक्ता एवं बिना विभागीय मन्त्री प्रदीपकुमार सुनुवारले बताए । उनका अनुसार निजामती ऐन परिमार्जन गर्ने अर्को निर्णय पनि बैठकमा भएको छ । कर्मचारीको सरुवा, बढुवा, तालिमलगायत वृत्तिविकासका लागि ऐन परिमार्जन गर्ने निर्णय भएको जानकारी सुनुवारले दिए । 

त्यस्तै,बाढी र पहिरोलगायतका दैविक प्रकोपबाट हुनसक्ने सम्भावित क्षति रोक्नका लागि पूर्व तयारी गर्ने निर्णय पनि मन्त्रिपरिषद् बैठकले गरेको छ । ‘बाढी र पहिरोलगायतका प्रकोपले विभिन्न ठाउँमा मानवीय एवं भौतिक क्षति गरिरहेको छ,’सरकारका प्रवक्ता सुनुवारले भने,‘आगामी दिनमा सम्भावित क्षति रोक्न पूर्व तयारीमा जुट्ने निर्णय बैठकमा भएको छ ।’ साथै,पीडितहरूका लागि राहत र क्षतिपूर्ति वितरण प्रक्रियालाई प्रभावकारी बनाएर लगिने उनको भनाइ छ । 

मन्त्रिपरिषद् बैठकबाट रुससँग मित्रराष्ट्रका रुपमा भाइचाराको सम्बन्ध विस्तार गर्नका लागि नेपाल सरकारलाई अनुरोध गर्ने निर्णय पनि भएको सुनुवारले बताए । मुख्यमन्त्री थापाको अध्यक्षतामा बसेको मन्त्रिपरिषद् बैठकमा आर्थिक मामिला तथा योजना मन्त्री जीवन आचार्य तथा बिना विभागीय मन्त्रीहरु सुनुवारसहित राजेन्द्र कार्की,कमलप्रसाद जबेगू र रामकुमार खत्री सहभागी थिए ।