विराटनगर : मोरङको उत्तरी लेटाङमा व्यक्तिका घरबाटै प्रतिबन्धित औषधिको खरिदबिक्री हुने गरेको पाइएको छ । खुला सीमाको फाइदा उठाउँदै भारतबाट भित्राइने प्रतिबन्धित औषधि घरघरमा राखेर सेवनकर्तालाई बिक्री गर्ने गरिएको हो ।
घरघरमा भण्डारण गरेर राखिने अवैध औषधि रकम लिएर लागुऔषधका प्रयोगकर्तालाई उपलब्ध गराउने गरिएको प्रहरीको अनुसन्धानबाट खुलेको छ । नेपालमा प्रयोगमा प्रतिबन्ध लगाइएको औषधि लुकाइछिपाइ भारतबाट ल्याउने गरिएको हो ।
लागुऔषधका सेवनकर्तालाई लक्षित गरेर भित्राइने औषधिको खरिदबिक्री घरघरबाटै हुने गरेको छ । घरबाटै प्रतिबन्धित औषधि बिक्री गरिरहेका एकजना युवालाई प्रहरीले शनिबार राति लेटाङ नगरपालिका–३ बाट पक्राउ गरेको छ ।
बिना इजाजत अवैध औषधि खरिदबिक्री भइरहेको विशेष सूचनाका आधारमा इलाका प्रहरी कार्यालय लेटाङबाट पुगेको टोलीले राति ८:३० बजेतिर लुसान बर्देवालाई पक्राउ गरेको हो । बर्देवाको घरमा खानतलासी गर्दा स्पासपेन ३ सय १२ र ट्रामाडोल ३ सय ट्याब्लेट बरामद भएको मोरङ प्रहरीका प्रवक्ता डीएसपी रन्जनकुमार दाहालले जानकारी दिए ।
उनका अनुसार घरबाटै प्रतिबन्धित औषधि बरामद भएपछि उनलाई पक्राउ गरिएको छ । बर्देवाका सम्बन्धमा इन्सपेक्टर विकाश थपलिया नेतृत्वको टोलीले अनुसन्धान अघि बढाएको छ । थप अनुसन्धान र कारबाही अघि बढाउन उनलाई औषधि व्यवस्था विभागको जिम्मा लगाउने तयारी छ ।
इन्स्पेक्टर थपलियाको नेतृत्वमा प्रहरीले लेटाङका ग्रामीण क्षेत्र लक्षित विशेष ‘अप्रेशन’ चलाइरहेको छ । प्रहरी सक्रियतासँगै प्रतिबन्धित औषधि एवं लागूऔषधका कारोबारी र प्रयोगकर्ता धमाधम पक्राउ परिरहेका छन् । लागुऔषधसहित पक्राउ परेकालाई प्रहरीले लागुऔषध ऐनअन्तर्गतको मुद्दा चलाउँछ भने प्रतिबन्धित औषधिसहित पक्राउ पर्नेलाई आवश्यक कारबाहीका लागि विभागमा बुझाउने गरिएको छ ।
लागुऔषध गाँजा मुद्दाको अनुसन्धानका लागि प्रहरीले असार २८ गते लेटाङबाटै ४ जनालाई पक्राउ गरेको थियो । लेटाङ–९ का २२ वर्षीय झुप्पे भनिने बसन्त मगर,२१ वर्षीय संयोग बुर्जामगर,२० वर्षीय आशुतोष राई र १९ वर्षीय प्रयास राई पक्राउ परेका हुन् ।
प्रहरीले असार २६ गते लेटाङ–३ कृतिमानबाट लागूऔषध खैरो हेरोइन (ब्राउन सुगर) २३ वर्षीय थीरबहादुर राउत र २२ वर्षीय एनोश तामाङलाई पक्राउ गरेको थियो । राउत बिक्रेता र तामाङ खरिदकर्ता हुन् । खैरो हेरोइन खरिद गर्न तामाङ राउतको घरमा पुगेका थिए । उनीहरूबाट ४९ मिलिग्राम हेरोइन बरामद भयो ।
गाँजा र प्रतिबन्धित औषधिसहित असार २० गते लेटाङ–९ का २० वर्षीय दिवाहाङ राई र पवन बाग्दास पक्राउ परे । प्रहरीले खानतलासी गर्दा घरबाट लागुऔषध गाँजा आधा किलो तथा प्रतिबन्धित औषधि स्पासपेन २ सय र ट्रामाडोल २ सय ट्याब्लेट बरामद भएको थियो । राई र बाग्दाससँगै गाँजाको अवैध धन्दामा संलग्न रहेको पाइएपछि असार २८ गते थप ४ जना पक्राउ परेका हुन् ।
प्रहरीले असार २० गते नै लेटाङ–८ का २० वर्षीय सुवास कार्की र २५ वर्षीय लोकेश राईलाई पनि पक्राउ गरेको थियो । घरबाट स्पासपेन ५ सय ५३ र ट्रामाडोल ४ सय ४५ ट्याब्लेट बरामद भएपछि लेटाङ–९ का २६ वर्षीय अभिषेक दर्जी पनि पक्राउ परे । असार १६ गते लेटाङका २ वटा घरमा प्रहरीले छापा हानेको थियो । बिना इजाजत प्रतिबन्धित औषधि लुकाएर एवं संचय गरेर घरमा राखेको पाइएपछि लेटाङ–३ का तेजनकुमार राई पक्राउ परेका थिए । प्रतिबन्धित औषधिको कारोबारमा संलग्न लेटाङ–३ का श्यामकुमार लिम्बू फरार छन् ।
लेटाङका ग्रामीण क्षेत्रका घरघरमा पछिल्लो समय लागुऔषध एवं प्रतिबन्धित औषधि छ्यापछ्याप्ती फेला पर्न थालेको डीएसपी दाहालले बताए । उनका अनुसार कारोबार र दुव्र्यसनीको संख्या बढेसँगै ग्रामीण क्षेत्रमा अपराधिक घटना बढ्ने सम्भावनालाई मध्यनजर गरेर कारबाही तीव्र पारिएको छ ।
औषधिजन्य वस्तुसँग जोडिएको अवैधधन्दा नियन्त्रण गर्न र लागुऔषधको दुव्र्यसनबाट समाजलाई मुक्त गर्न प्रहरी सक्रियता बढाइएको मोरङ प्रहरी प्रमुख एसपी दीपक पोखरेलले बताए । उनका अनुसार प्रहरी सक्रियतासँगै लागुऔषध तथा प्रतिबन्धित औषधिको कारोबार र दुव्र्यसनमा संलग्न धमाधम पक्राउ परिरहेका छन् । ‘घरघरमा लागुऔषध तथा नेपालमा प्रयोगमा प्रतिबन्ध लगाइएको औषधि फेला पर्ने गरेको पाइयो,’ उनले भने, ‘प्रहरी टोली परिचालन गरेर विशेष अभियान चलाइएसँगै प्रहरीले सफलता प्राप्त गरिरहेको छ ।’
पछिल्लो समय प्रतिबन्धित औषधि मिसाएर लागूऔषधका रूपमा प्रयोग गर्ने क्रम बढेको प्रहरी अनुसन्धानबाट खुलेको छ । लागुऔषधका दुव्र्यसनीले ट्रामाडोल र स्पासपेन मिसाएर सेवन गर्ने गरेका हुन् । लागुऔषधको दुव्र्यसनले व्यक्तिगत स्वास्थ्यसँगै धन सम्पत्तिसमेत सखाप पारिहेको र अपराधिक घटना पनि बढाउने गरेको एसपी पोखरेल बताउँछन् ।
‘दुव्र्यसनले व्यक्ति,परिवार र समाजमा पारिरहेको नाकारात्मक असरका बारेमा सबैलाई प्रष्ट पार्न जनचेतनामूलक कार्यक्रम तथा कानुनी कारबाहीलाई प्राथमिकतामा राखिएको छ,’ उनले भने, ‘दुव्र्यसन र कारोबार रोक्न प्रहरी आक्रामक बनेको छ ।’
बेलैमा सबैले ध्यान नदिए लागुऔषधले ठूलै समस्या निम्त्याउने अवस्था रहेको एसपी पोखरेल बताउँछन् । अपराधिक घटनामा दुव्र्यसनीको संलग्नता हुने गरेको बताउँदै उनले दुव्र्यसन र यसको जालोमा युवापुस्ताको संलग्नता धेरै पाइने उल्लेख गरे ।
प्रतिक्रिया दिनुहोस !
