महोत्तरी : महोत्तरीको महोत्तरी गाउँपालिका–२ स्थित एनएमबी बैंकमा लुटपाट गरेका एक भारतीय नागरिक पक्राउ परेका छन् । पक्राउ पर्नेमा भारतको विहार राज्यको मधुबनीका २० वर्षीय अजयकुमार साफी रहेका छन् ।
जिल्ला प्रहरी कार्यालयका प्रवक्ता प्रहरी नायब उपरीक्षक दिलीपकुमार गिरीका अनुसार गत जेठ १६ गते रु १५ लाख लुटेको घटनामा साफी संलग्न थिए । चार-पाँच जनाको समूहमा आएको नकाबधारी समूहले बैंकका कर्मचारी तथा सेवाग्राहीसमेतलाई कब्जामा लिएर सो रकम लुटेका थिए । डाँका गरी नम्बर नखुलेको मोटरसाइकलमा उनीहरु फरार भएका थिए ।
साथै प्रहरीले घटनामा संलग्न अन्य तीन÷चार जनाको पनि पहिचान गरिसकेको तर अनुसन्धान गोपनीयताको कारण सबैको नाम, ठेगाना उल्लेख गर्न नसकिने जनाएको छ । अन्य फरार व्यक्तिको पनि खोजतलास व्यापकरुपमा भइरहेको र चाँडै पक्राउ गरी सार्वजनिक गरिने जिल्ला प्रहरी कार्यालय महोत्तरीका प्रहरी उपरीक्षक प्रकाश मल्लले बताए। रासस
प्रतिक्रिया दिनुहोस !
