विराटनगर : महिलाले घाँटीमा लगाएको सुनको सिक्री थुत्ने गिरोहलाई प्रहरीले मोरङको सुन्दरहरैँचाबाट पक्राउ गरेको छ । पर्सा घर भएका तीनजना सुन्दरहरैँचा नगरपालिका–८ सलकपुरबाट शनिबार साँझ पक्राउ परेका हुन् ।
पक्राउ पर्नेमध्ये एकजना १० वर्षीय बालक पनि छन् । मोरङ प्रहरीका प्रवक्ता डीएसपी रन्जनकुमार दाहालका अनुसार पर्साको वीरगन्ज महानगरपालिका–१६ का २६ वर्षीय विशाल राय, जगरनाथपुर नगरपालिका–६ का २९ वर्षीय उमेश राय यादव र १० वर्षीय बालक पक्राउ परेका हुन् ।
सुलकपुरस्थित बजारमा साँझ ७ बजेतिर शब्जी किन्दै गरेकी सुन्दरहरैँचा–९ की निर्मला राईको घाँटीबाट विशालले सिक्री थुतेको प्रहरीले जनाएको छ । महिलाले घाँटीमा लगाएको सिक्री थुतेर भाग्न खोज्दै गर्दा उनलाई नियन्त्रणमा लिएर स्थानीयले प्रहरीको जिम्मा लगाएका थिए । प्रहरीका अनुसार थुत्नसाथ सिक्री विशालले १० वर्षीय बालकलाई थमाइदिएको पत्ता लागेको छ ।
प्रहरीले सिक्री बालकको साथबाट बरामद गरेको हो । ‘सिक्री थुतिसकेपछि बालकलाई दिँदा रहेछन् । कसैले शंका नगर्ने भएकाले बालकलाई सिक्री थमाउने गरेको पाइयो,'डीएसपी दाहालले भने,‘शरीर खानतलासी गर्दा घटनामा संलग्न विशालको साथबाट सिक्री भेटिएन । बालकले बोकेका रहेछन् ।’
सिक्री थुतेको घटनामा संलग्नलाई नियन्त्रणमा लिएको जानकारी स्थानीयले गराएपछि इलाका प्रहरी कार्यालय विराटचोकबाट प्रहरी घटनास्थल पुगेको थियो । तर, विशालको साथबाट सिक्री फेला परेन । नजिकै रहेका बालकको साथबाट सिक्री भेटिएको प्रहरीको भनाइ छ । उमेश बालकसँगै थिए ।
तीनैजनालाई इलाका प्रहरी कार्यालय बेलबारीमा राखेर प्रहरी निरीक्षक (इन्सपेक्टर) उदय शम्शेर राणा नेतृत्वको टोलीले घटनाको थप अनुसन्धान गरिरहेको छ । सिक्री थुतेको अन्य घटनामा पनि उनीहरुको संलग्नता हुनसक्ने प्रहरीको आशंका छ । पक्राउ परेकाविरुद्ध चोरी–डाँका मुद्दा चलाउने तयारी प्रहरीको छ ।
प्रतिक्रिया दिनुहोस !
