अन्तत: एक मन्त्रालयमै चित्त बुझायो नागरिक उन्मुक्तिले, बिहीबार सरकारमा जाने

धनगढी : प्रदेश सरकार गठन भएदेखि नै दुई मन्त्रालयको माग गर्दै सरकारमा सहभागी नभएको नागरिक उन्मुक्ति पार्टी अन्तत: एक मन्त्रालयमै चित्त बुझाएर बिहीबार सरकारमा जाने भएको छ ।

नागरिक उन्मुक्ति पार्टीका संरक्षक रेशम चौधरीले एक मन्त्री, एक राज्यमन्त्री र दुईवटा विषयगत समितिको सभापतिका लागि मंगलबार गठबन्धनमा सहमति भएको बताए । मंगलबार गठबन्धनका शीर्ष नेताहरू प्रधानमन्त्री पुष्पकमल दाहाल, नेपाली कांग्रेसका सभापति शेरबहादुर देउवा, समाजवादीका अध्यक्ष माधवकुमार नेपाल, नागरिक उन्मुक्ति पार्टीका अध्यक्ष रञ्जीता श्रेष्ठ चौधरी र संरक्षक रेशमलाल चौधरीबीच सरकारमा सहभागी हुने सहमति भएको हो ।

‘गठबन्धनका शीर्ष नेताहरूबीच एक मन्त्री, एक राज्यमन्त्री र दुईजना विषयगत सभापति दिने सहमति भएको छ, बिहीबार सरकारमा जान्छौं,' काठमाडौंमा रहेका नागरिक उन्मुक्तिका संरक्षक  रेशमलाल चौधरीले टेलिफोनमा भने ।

उनले बुधबार टीकापुरमा उन्मुक्तिको संसदीय दलको बैठक बोलाएको बताए । ‘बुधबार टीकापुरमा पार्टीको संसदीय दलको बैठक बोलाएको छु, सरकारमा कुन- कुन सांसद पठाउने भन्ने कुराको टुंगो दलको बैठकले लगाउने छ । तर सरकारमा जाने निर्णय नै भइसक्यो,'चौधरीले भने ।

मुख्यमन्त्री कमल बहादुर शाहले उन्मुक्तिका लागि सरकार गठन भएदेखि नै भूमी व्यवस्था कृषि तथा सहकारी मन्त्रालय राखेका छन् । त्यही मन्त्रालयमा राज्यमन्त्री पनि दिने तयारी भएको बताइएको छ । यसअघि रामेश्वर चौधरीलाई मन्त्री र खुसीराम चौधरीलाई राज्यमन्त्री बनाउने भन्दै उनीहरु धनगढी आएपनि एकाएक पार्टी अध्यक्ष रञ्जिता चौधरीले सरकारमा नजाने निर्णय गरेकाले उनीहरुको शपथ हुन सकेको थिएन । 

५३ सदस्यीय सुदूरपश्चिम सरकारमा कांग्रेसको नेतृत्वमा सरकार गठन भएको छ । १९ प्रदेश सभा सदस्य रहेको कांग्रेस मुख्यमन्त्री कमलबहादुर शाह, भौतिक पूर्वाधारमन्त्री प्रकाश देउवासहित सरकारमा छन् । 
कांग्रेसले आन्तरिक मामिला मन्त्रालय पनि भाग पाएकोमा मन्त्री पृथ्वीबहादुर सिंहको सडक दुर्घटनामा ज्यान गएपछि उक्त मन्त्रालय पनि असार ५ गते देखि खाली छ ।

कांग्रेससँगै नेकपा माओवादी केन्द्र सभामुख,सामाविक विकास मन्त्रालय र उद्योग पर्यटन वन तथा वातावरण मन्त्रालयसहित सरकारमा छ भने नेकपा एसले आर्थिक मामिला मन्त्रालय पाएको छ । कांग्रेस नेतृत्वको प्रदेश सरकारसँग कांग्रेसका १९, माओवादीका १०, नागरिक उन्मुक्ति पार्टीका ७ र समाजवादीका ४ गरी ४१ जना प्रदेश सभा सदस्यको दुई तिहाइ बहुमत छ । उपसभामुखमा भने एमालेकी कोइली देवी चौधरी छिन्।