जोमसोम : मुस्ताङको मार्फा लेकमा भीरबाट लडेर एकजनाको मृत्यु भएको छ । सोमबार म्याग्दीको रघुगंगा—१ घर भइ मुस्ताङको घरपझोङ -२ मार्फा बस्ने ४२ वर्षीय कालिबहादुर गर्बुजाको मृत्यु भएको जिल्ला प्रहरी कार्यालय मुस्ताङले जनाएको छ ।
मुस्ताङको मार्फा गाउँमाथि भेडाबाख्रा चराउन गोठमाथिको लेकमा जाँदा भीरबाट लडेर मृत्यु भएको प्रहरी निरीक्षक गोपीकृष्ण सुवेदीले उल्लेख गरे । मृतक गर्बुजाको शव गोठ रहेको स्थानभन्दा पश्चिमको उकालो भीरमा फेला परेको बताइएको छ ।
जिम्बु टिपेर फर्किंदा लडेर मृत्यु भएको हुनसक्ने अनुमान गरिएको छ ।
गोठबाट भेडाबाख्रा चराउन मार्फा लेक पुगेका गर्बुजा लेकबाट नफर्किएपछि आफन्तले प्रहरीलाई जानकारी गराएका थिए । प्रहरीले घटनास्थलबाट शव उठाएर मुस्ताङ अस्पतालमा पोस्टमार्टम गरी आफन्तलाई बुझाएको छ ।
प्रहरीले घटनाबारे थप अनुसन्धान भइरहेको जनाएको छ ।
प्रतिक्रिया दिनुहोस !
