वीरगन्ज : पर्सामा बलात्कार, हत्यालगायत गम्भीर अपराधका घटनाहरू बढेको पाइएको छ। पर्सामा अघिल्लो आर्थिक वर्ष २०७८/७९ को तुलनामा गत आर्थिक वर्ष २०७९/८० मा बलात्कार, हत्या लगायतका गम्भीर अपराधका घटनाहरु बढेको जिल्ला प्रहरी कार्यालय पर्साले जनाएको छ ।
जिल्ला प्रहरी कार्यालय पर्सामा अघिल्लो आर्थिक वर्ष २०७८/७९ मा जबरजस्ती करणी (बलात्कार), जबरजजस्ती करणी उद्योग , कर्तव्य ज्यान (हत्या), बाल यौन दुर्व्यवहार , मानव बेचबिखन गरी गम्भीर अपराध सम्बन्धी ६६ वटा मुद्दा दर्ता भएका थिए ।
तर गत आर्थिक वर्ष २०७९/८० मा भने उक्त अपराधको संख्या बढेर ७८ वटा मुद्दा दर्ता भएको पर्साका प्रहरी उपरीक्षक कोमल शाहले जानकारी दिए । प्रहरी उपरीक्षक शाहका अनुसार ,गत आर्थिक वर्षमा सबै भन्दा बढि बलात्कार र बलात्कार सम्बन्धी घटना भएका छन् । गत आर्थिक वर्षमा जिल्ला प्रहरी कार्यालय पर्सामा बलात्कारका ४९ र बलात्कारको प्रयासका ५ वटा गरी ५४ वटा मुद्दा दर्ता भएको शाहले जानकारी दिए ।
अघिल्लो आर्थिक वर्षमा भने पर्सा प्रहरीमा बलात्कारका ३४ र बलात्कारको प्रयासका १३ वटा गरी ४७ वटा मात्र मुद्दा दर्ता भएका थिए । पर्सामा गत आर्थिक वर्षमा अघिल्लो आर्थिक वर्षको भन्दा बलात्कार र बलात्कारको प्रयासका गरी ७ वटा घटना बढी भएको प्रहरी उपरीक्षक शाहले बताए ।
यस्तै पर्सा प्रहरीमा गत आर्थिक वर्षमा कर्तव्य ज्यान (हत्या) सम्बन्धी १६ वटा मुद्दा दर्ता भएका छन् । अघिल्लो आर्थिक वर्षमा भने कर्तव्य ज्यान सम्बन्धी ११ वटा मात्र मुद्दा दर्ता भएका थिए । यसैगरी पर्सा प्रहरीमा गत आर्थिक वर्षमा बाल यौन दुव्र्यवहारका ४ र मानव बेचबिखनका पनि ४ वटा मुद्दा दर्ता भएको प्रहरी उपरीक्षक शाहले बताए । जबकि अघिल्लो आर्थिक वर्षमा भने बालयौन दुव्र्यवहारका १ र मानव बेचबिखनका ७ वटा मुद्दा दर्ता भएका थिए ।
जिल्ला प्रहरी कार्यालय पर्सामा बलात्कार सम्बन्धी मुद्दा दर्ताको संख्या बढ्नुको विभिन्न कारण रहेको प्रहरी उपरीक्षक शाहले बताए । गाउँघरमा पछिल्लो समय विवाहको उमेर नपुगेका किशोरी आफ्नो प्रेमीसँग भागेपछि किशोरीका अभिभावकले प्रहरी कार्यालयमा जबरजस्ती करणीको मुद्दा दर्ता गराउने गरेका कारण पनि बलात्कारका मुद्दा दर्ताको संख्या बढेको उनको भनाइ छ।
यसका साथै लिभिङ टुगेदरमा रहेका प्रेमीप्रेमिकाबीच पछि गएर सम्बन्ध बिग्रिएपछि प्रेमिका (युवती वा महिला) ले प्रेमीविरुद्ध बलात्कारको मुद्दा दर्ता गराउने गरेका कारणले पनि बलात्कार सम्बन्धी मुद्दा दर्ताको संख्या बढि देखिए उनले बताए ।
शाहले भने,‘केहि त वास्तविक रुपमै जबरजस्ती करणीका घटना भएका छन् ,तर त्योसँगै केटासँग भागेका केटी (१८ वर्ष भन्दा कम उमेरका ) का अभिभावकले आफ्नी छोरीको बलात्कार भयो भनेर मुद्दा दर्ता गराउँछन् ,जुन कानुन अनुसार पनि जबरजस्ती करणी नै हुन्छ । '
यसका साथै पछिल्लो समय प्रहरीप्रति बढ्दै गएको जनविश्वास र प्रहरी कहाँ पुगे न्याय पाइन्छ भन्ने चेतना पनि जनमानसमा बढ्दै गएका कारणले पनि बलात्कार सम्बन्धी मुद्दा दर्ताको संख्यामा वृद्धि भएको शाहले बताए ।
उनले भने,‘पहिलेपहिले यस्ता घटनाहरू सामाजिक दबाबलगायतका कारणले गाउँघरमै मिलापत्र गराएको भेटिन्थ्यो ,प्रहरीसामु ती घटना आउनै पाउदैनथे तर पछिल्लो समय जनचेतना बढ्दै गएको छ, प्रहरीकोमा पुगे न्याय पाइन्छ भन्ने प्रहरीप्रतिको जनविश्वास बढ्दै गएको कारणले प्रहरीकोमा ती घटनाहरू आइरहेका छन् । '
प्रतिक्रिया दिनुहोस !
