जोमसोम : मनाङ–मुस्ताङ र कर्णाली प्रदेशको डोल्पा र मुगु जोड्ने रणनीतिक महत्वको सडकको ट्रयाक खोल्ने कार्य अन्तिम चरणमा पुगेको छ।
डोल्पा र मुस्ताङको सिमाना याकखर्कसम्मको सडक जोडिन अब धेरै टाढा नरहेको सडक डिभिजन कार्यालय बाग्लुङले बताएको छ। अब १० किलोमिटर ट्याक खोल्न बाँकी छ।
चार जिल्लाका बासिन्दालाई यातायात आवतजावत, मालसामान ढुवानी र पर्यटकीय मार्गलाई सहजता प्रदान गर्न कार्यालयले उच्च प्राथमिकता दिएर सडक निर्माणको काम गरिरहेको छ।
सडक स्तरोन्नति तथा नयाँ ट्याक खोल्नका लागि सरकारले २०७५/०७६ सालदेखि सडक निर्माणको कामलाई अघि बढाएको हो।
हालसम्म मुस्ताङका डोल्पा सडकको आधा दर्जन प्याकेजमा सडक निर्माण भइसकेको छ भने सडकका लागि झन्डै २० करोड बजेट खर्च भइसकेको डिभिजन सडक कार्यालयले बताएको छ।
हालसम्म मुस्ताङ-डोल्पा जोड्ने सडकको ४६ दशमलव ५ मिटर सडकको ट्याक खुलिसकेको कार्यालयका ई कृष्णबहादुर खड्काले जानकारी दिए।
आर्थिक वर्ष २०७९/०८० का लागि मुस्ताङ—डोल्पा सडकका लागि ३ करोड १७ लाख बजेट विनियोजन भएको थियो। सो बजेटमा ८ हजार घनमिटर माटो, ४ हजार ५ सय घनमिटर चट्टान काटेर सडक ट्याक खोल्ने र १३ सय घनमिटर ग्याविन वाल लगाउने कामको जिम्मा सिखा इन्जनियरिङ र पम्फा जेभी कन्ट्रक्सनले २०७९ फागुन २ गते ठेक्का सम्झौता गरेको थियो।
ट्याक खोल्न आर्थिक वर्ष २०८०/०८१ मा २ करोड बजेट विनियोजन भएको उनले बताए।
प्रतिक्रिया दिनुहोस !
