मोटरसाइकल चालक नालीभित्र मृत फेला
![मोटरसाइकल चालक नालीभित्र मृत फेला](https://annapurnapost.prixacdn.net/media/albums/Death-body_20180706101931_1_20180901025337_TJJr0BLVfF_5erKgC1fGp.jpg)
विराटनगर : मोरङको कानेपोखरी गाउँपालिका–५ मा सोमबार बिहान मोटरसाइकल चालक नालीभित्र मृत फेला परेका छन् । इलाका प्रहरी कार्यालय पथरीका डीएसपी लक्ष्मी भण्डारीका अनुसार कानेपोखरी–५ का ३० वर्षीय शिवचन्द्र यादवको शव नालीभित्र भेटिएको हो ।
यादवले चलाएको लु ३७ प ९९४२ नम्बरको मोटरसाइकल पनि नालीभित्रै लडिरहेको अवस्थामा फेला परेको हो । आफैं अनियन्त्रित भएर मोटरसाइकलसहित चालक नालीभित्र खसेको हुनसक्ने प्रहरीको अनुमान छ ।
यादव बिहान ६ बजेतिर मृत फेला परेपछि स्थानीयले प्रहरीलाई घटनाको जानकारी गराएका हुन् । डीएसपी भण्डारीका अनुसार उत्तरबाट पूर्व–दक्षिण जाँदै गरेको अवस्थामा मोटरसाइकल दुर्घटनामा परेको हुनसक्ने अनुमान गरिएको छ । टाउकोमा हेल्मेट नलगाएको अवस्थामा चालकको शव फेला परेको उनले बताए ।
‘मोटरसाइकल अनियन्त्रित भएपछि चालकको टाउको नालीमाथि बनाइएको विश्रामस्थलमा ठोक्किएको हुनसक्छ,’भण्डारीले भने,‘नालीभित्र चालकको शव र त्यही नालीमा मोटरसाइकल पनि फेला परेको हो ।’ उनका अनुसार शवलाई पोस्टमार्टमका लागि उर्लाबारीको मंगलबारेस्थित मदन भण्डारी अस्पताल एवं ट्रमा सेन्टर पठाएर घटनाको अनुसन्धान सुरु गरिएको छ ।
प्रतिक्रिया दिनुहोस !
![Unity](https://annapurnapost.prixacdn.net/static/assets/images/unity-logo.png)