सिन्धुली : सोमबार बेलुकादेखि लगातार परेको वर्षाको कारण कमला नदीमा आएको बाढीले खतराको तह पार गरेको छ । कमलामाई नगरपालिका- १४ रानिवासमा रहेको जलमापन केन्द्रका अनुसार कमला नदीमा अहिले तीन मिटर ३० सेन्टिमिटर बाढी पुगेको छ ।
जलमापन केन्द्रकी सीता पौडेलका अनुसार केन्द्रले मंगलबार बिहान ३ बजेको मापन अनुसार तीन मिटर ३० सेन्टिमिटर पुगेको हो । कमला नदीमा तीन मिटरसम्मको तहलाई खतरा मानिएको छ। नदीमा बाढीले खतराको तह पार गरेपछि कमलामाई नगरपालिका र दुधौली नगरपालिका जोखिममा परेको छ । कमलामाई नगरपालिकाको १३ र १४ को माथ्लो रानिवास र तल्लाो रानिवास, दुधौलीको निपाने, हत्पते, डकाहा, हर्षाही, टाँडी, दुधौली लगायतका क्षेत्र बाढीको उच्च जोखिममा परेका छन् ।
नदीले खेत कटान समेत गरिरहेको छ। डुबान हुने क्षेत्रमा उच्च सर्तकता अपनाउन सिन्धुली प्रशासनले अनुरोध गरेको छ ।
यस्तै हरिहरपुरगढी गाउँपालिका- ३ को गुर्जी लगायतका क्षेत्रमा डुवान तथा कटान सुरू भएको छ । बागमती नदीमा आएको बाढीले खेति योग्य जमिन कटान गर्न थालेको गाउँपालिकाका अध्यक्ष वज्रध्वज वाईवाले बताए । तिनपाटनमा चँदाहा खोलाले पनि बेलघारी र भिमस्थानमा खेत कटान सुरू गरेको बताइएको छ ।
यो पनि पढ्नुहोस
प्रतिक्रिया दिनुहोस !
