वीरेन्द्रनगर : जुम्लामा घरघरमा आगजनी गर्ने व्यक्तिलाई प्रहरीले सार्वजनिक गरेको छ । यही साउन ५ र ६ गते तथा विभिन्न समयमा सातवटा घर, ट्याक्टर र अटो रिक्सामा आगजनी गर्ने जुम्लाको गुठीचौर गाउँपालिका–४ उखाडी घर भई चन्दननाथ नगरपालिका–२ भण्डारीवाडा बस्ने रत्नबहादुर अधिकारीलाई प्रहरीले सार्वजनिक गरेको हो ।
सातवटा घर अधिकारीले जलाएको पुष्टि भएको छ । एकै समयमा जलेको ट्याक्टर,अटो रिक्सामा समेत उनले आगजनी गरेको खुलेको जिल्ला प्रहरी कार्यालय जुम्लाका प्रहरी नायब उपरीक्षक प्रलाद कार्कीले बताए ।
अधिकारीले साउन २ गते चन्दननाथका साउनेखर कामीको गाईभैंसी पाल्ने कच्ची गोठसमेत जलाएको प्रहरीले भनाइ छ । रत्नबहादुरले आफू गरिब भएकाले कसैले पनि ऋण नदिएको,उधारो पनि नपत्याउने भएकाले यस्ता कार्य गरेको प्रहरीसमक्ष बताएका छन् ।
प्रहरीका अनुसार उनले नेपाली सेनामा केही समय जागिर खाएर छोडेका थिए । प्रहरीले उनलाई साउन ६ गते पक्राउ गरेको थियो ।
प्रतिक्रिया दिनुहोस !
