कैदीबन्दी मृत्यु प्रकरण : राष्ट्रिय मानव अधिकार आयोगको टोली सङ्खुवासभामा

खाँदबारी : जिल्ला कारागार संखुवासभामा सुरक्षा घेराभित्र कैदीको मृत्युपछि राष्ट्रिय मानव अधिकार आयोगको टोली खाँदबारी आएको छ । राष्ट्रिय मानव अधिकार आयोगको टोलीले शुक्रबार बिहानैबाट घटनाको अनुसन्धान सुरु गरेको हो । 

संखुवासभाको मादी नगरपालिका–५ का १९ वर्षिय विनोद तोलाङ्गी र नुवाकोटको ककनी गाउँपलिका–७ का २८ वर्षीय आकाश बलामीको कुटपिटबाट मृत्यु भएको घटना बाहिरिएपछि  मानव अधिकारकर्मीको टोली खाँदबारी आइपुगेको हो । 

घटनाबारे अनुसन्धान गर्न राष्ट्रिय मानव अधिकार आयोग कोसी प्रदेशका प्रमुख उपसचिव पवन कुमार भट्ट, मानव अधिकार अधिकृत चिरञ्जीवि कोइराला,देवेन्द्र रेग्मीको टोलीले अनुसन्धान सुरू गरेका हुन् । घटनाको अनुन्धानका लागि अनौपचारिक क्षेत्र सेवा केन्द्र (इन्सेक) कोशी प्रदेश प्रमुख सोम थापासहितको ३ जनाको टोली पनि खाँदबारी आइपुगेको छ । 

गृहमन्त्रालयअन्तर्गत कारागार विभागका निर्देशक कमलप्रसाद पाण्डेको नेतृत्वमा बनेको पाँच सदस्यीय टोली अनुसन्धानका लागि खाँदबारी आइपुगेको संखुवासभाका प्रमुख जिल्ला अधिकारी शिवकुमार कार्कीले जानकारी दिए । 

टोलीमा प्रहरी नायब उपरीक्षक कौशल बुढाथोकी, अनुसन्धान अधिकृत कुमार बुढाथोकी, कानुन अधिकृत तुलबहादुर खड्का र जिल्ला प्रशासन कार्यालय संखुवासभाका अधिकृत भोगेन्द्र श्रेष्ठ छन् । पाण्डे नेतृत्वको टोलीले समेत छानबिन सुरु गरिकेको छ । 

घटनामा प्रहरीको समेत संलग्नता देखिएपछि कोशी प्रदेश प्रहरी कार्यालयले एसपी ऋषिराम कडेलको नेतृत्वमा आएको ४ सदस्यीय छानबिन समितिले बिहीबारबाट नै अनुसन्धान सुरु गरिसकेको छ । घटनामा संलग्न रहेको आरोपमा १० जना प्रहरीलाई नियन्त्रणमा लिइ अनुसन्धान सुरु गरेको छ । 

प्रहरीका अनुसार सीसीटीभी फुटेजका आधारमा १० जना प्रहरीमाथि अनुसन्धान भइरहेको छ । कारागारको बन्दीगृहको ब्लक ‘ए’ मा ६६ जना कैदीमध्ये नौजना कैदीलाई सुरक्षाका लागि भन्दै जिल्ला प्रहरी कार्यालयको हिरासतमा लगिएको जिल्ला प्रहरी कार्यालयका डीएसपी गोदारले जानकारी दिए ।  

आफन्तले किटानी दिएपछि प्रहरी र कैदीबन्दीलाई म्याद थपका लागि जिल्ला अदालत चैनपुर लगिने डीएसपी गोदारले जानकारी दिए । घटनामा संलग्नलाई प्रहरी नियन्त्रणमा नै रहेकाले प्रमाणका आधारमा सबैलाई कारबाही हुने उनले बताए । 

कारागार नौ जना कैदीबन्दीलाई कारागार प्रशासनले जिल्ला प्रहरी कार्यालयलाई सुरक्षाका लागि अन्यत्र लागिदिन अुनरोध गरेपछि प्रहरी कार्यालयको हिरासत कक्षामा राखिएको डीएसपी गोदारले बताए । कैद भुक्तान गरिरहेका कैदीबन्दीलाई अनुसन्धान गर्ने अधिकार समेत प्रहरीमा नरहेकाले आफन्तको किटानी जाहेरीको आधारमा अदालतबाट म्याद थप भएपछि मात्र अनुसन्धन गरिने उनले बताए ।

 डीएसपी गोदारले भने,‘प्रहरी नियन्त्रणमा रहेका घटनमा संलग्न प्रहरीमाथि अनुसन्धान भइरहेको छ ।’ कुटपिटपछि उनीहरूलाई प्रहरी बन्दीगृहको ब्लक ‘ए’ लगेर राखिएको थियो । ब्लक ‘ए’ ६६ जना कैदीबन्दी बस्दै आएका थिए ।

भित्र पनि कैदीबन्दीहरुले उनीहरूमाथि कुटपिटको बताएका छन् । २५ जनाको क्षमता रहेको कारागारमा अहिले १ सय ३६ जना कैदीबन्दी छन्।