बबईमा बेपत्ता हुनेको संख्या ३ पुग्यो, २२३ घर डुबान
![बबईमा बेपत्ता हुनेको संख्या ३ पुग्यो, २२३ घर डुबान](https://annapurnapost.prixacdn.net/media/albums/Untitled-1_zuOiAE7aK6_nXz0pAi5TU.jpg)
गुलरिया: बबई नदीमा बेपत्ता हुनेको संख्या ३ पुगेको छ। गुलरिया नगरपालिका-२ निवासी महेश चौधरी पण्डितपुर घाटबाट बेपत्ता भएका छन्।
बबई नदीमा दाउरा छोप्ने क्रममा गुलरिया नगरपालिका-२ का २७ वर्षीय महेश चौधरी, वडा नम्बर ८ निवासी २३ वर्षीय अक्षय चौधरी र वडा नम्बर १२ निवासी ३० वर्षीय वालकृष्ण थारू बेपत्ता भएको जिल्ला प्रहरी कार्यालय बर्दियाका प्रहरी नायव उपरीक्षक हिक्मतबहादुर बोहराले पुष्टि गरे।
तीनै जनाको नेपाल प्रहरी, सशस्त्र प्रहरी र नेपाली सेनाले मोटरबोटसहित खोजीकार्य भइरहेको उनले बताए। दुई दिनदेखि परेको अविरल वर्षाका कारण बर्दियाका दुई पालिका डुबानमा परेको छ।
बाँसगढीका दुईवटा वडा र बारबर्दिया नगरपालिकाका तीनवटा वडा डुवान प्रभावित भएका हुन्। बाँसगढी नगरपालिका वडा नम्बर ८ को रेशमपुर र ९ को कुइनेठीमा १ सय २० गरी १ सय ८० घर डुबान भएको जिल्ला प्रहरी कार्यालय बर्दियाका प्रहरी नायव उपरीक्षक बोहराले बताए।
उनीहरू स्थानीय छिमेकीको घरहरूमा आश्रय लिएका छन्। त्यस्तै बारबर्दिया नगरपालिका वडा नम्बर ७, ८ र ९ मा ४३ घर डुबानमा परेका छन्।
बारबर्दियाका तीनवटै वडाका डुबान प्रभावित स्थानीयहरू सरस्वती माध्यमिक विद्यालय र युवक माध्यमिक विद्यालयमा आश्रय लिइरहेको उनले जानकारी दिए।
प्रतिक्रिया दिनुहोस !
![Unity](https://annapurnapost.prixacdn.net/static/assets/images/unity-logo.png)