कालिगण्डकी कटानले जोमसोमको सडकमा धजा पर्‍यो, मुक्तिनाथसँग सिधा यातायात बन्द

 

जोमसोम : कालिगण्डकी कटानका कारण मुस्ताङको जोमसोम बजार क्षेत्रको करिव ५० मिटर सडक चर्किएर धजा परेको छ । सडक र्चिर्कएर धजा परेसँगै  मुक्तिनाथसँग सिधा सडक अवरुद्ध भएको जनाइएको छ ।

मुस्ताङको घरपझोङ गाउँपालिका—४ को सरकारी कार्यालय जाने झोलुङगे पुलदेखि मुस्ताङ अस्पतालसम्मको सडकमा कालिगण्डकी कटानले सडकको तल्लो खार्दै गएपछि सडक अवरुद्ध भएको घरपझोङ गाउँपालिकाका अध्यक्ष मोहनसिंह लालचनले जानकारी दिए । कालिगण्डकी कटानले करिव ११ मिटर चौडा सडकको करिव ८ मिटर चौडा सडक धजा परेर चर्किएको अध्यक्ष लालचनको भनाई छ ।

जमिन चर्किएर सडक धजा परेपछि मुक्तिनाथ जाने यात्रुले अर्को सवारी साधन परिवर्तन गर्नपर्ने उनले बताए । मोटरसाइकल भने क्रस गर्न सक्ने अध्यक्ष लालचनले उल्लेख गरे । सडक धजा परेको स्थानमा अहिले नेपाल प्रहरी र सशस्त्र प्रहरीको टोलीले कालिगण्डकीको सतहमा ग्याविन वाल लगाएर सडक सञ्चालन गर्न खटिएको अध्यक्ष लालचनले जनाए । उनले अस्पताल क्षेत्रको ढलको निकासमा समस्या र कालिगण्डकी कटानले सडम र्चिर्कएर धजा परेको उल्लेख गरे ।

यसैगरी घरपझोङ—१ छैरो तिब्बतीयन क्याम्प जाने सडक पनि कालिगण्डकीले भासिएको जनाइएको छ ।