उदयपुर : उदयपुरमा डेंगुका बिरामी बढ्न थालेका छन् । महामारीकै रुपमा फैलिएको डेंगुबाट २६६ जना संक्रमित भएका छन् । डेंगुबाट कटारी नगरपालिकाका २९ वर्षीय एक पुरुषको साउन १० गते ज्यान गएको छ । जिल्ला स्वास्थ्य कार्यालयका सूचना अधिकारी उमेश लुइँटेलका अनुसार जिल्लाका चारवटा नगरपालिकामा ८४५ जनामा गरिएको परीक्षणबाट २६६ जनामा पुष्टि भएको हो ।
लामखुट्टेको टोकाइबाट हुने डेंगु संक्रमणले बिरामीको संख्या दिनानुदिन बढ्दै गएको उनले बताए । लुइँटेलका अनुसार सबैभन्दा बढी त्रियुगा नगरपालिकामा ५२६ जनामा परीक्षण गरिएकोमा १५६ जनामा संक्रमण पुष्टि भएको हो।
त्यसैगरी बेलका नगरपालिकामा १४३ जनामा परीक्षण गरिएकोमा ४८ जनामा देखा परेको छ । चौदण्डिगढी नगरपालिकामा १३१ जनामा ४५ जना र कटारीमा ४५ जनामा १७ जनामा संक्रमण पुष्टि भएको उनले बताए । संक्रमितमध्ये सबैभन्दा बढी महिला ६१ र पुरुष ४८ जना रहेका छन् ।
उमेरगत हिसाबले १५ देखि ४९ वर्षका ६५ जना, १५ वर्ष उमेर समूहका ३४ जना र ५० वर्षमाथिका २३ जना रहेको कार्यालयले जनाएको छ । यसबाहेक नीजि अस्पतालमा उपचार गराएका बिरामीको तथ्यांक यसमा समावेश छैन् ।
नीजि अस्पतालमा पनि उस्तै बिरामीको चाप बढेको उनले बताए । जिल्ला अस्पतालमा उपचार गर्न जाने दैनिक एक हजार हाराहारी बिरामीमध्ये ६० प्रतिशतभन्दा बढी ज्वरोकै आउने गरको अस्पतालका प्रमखु मेडिकल सुपरिटेन्डेन्ट (मेसु) डा. ज्ञानेन्द्र झाले बताए । उनका अनुसार धेरैजसो बिरामी भाइइरल ज्वरोकै हुने गरेको र ज्वरो आउनेमध्ये केही प्रतिशत डेंगुका बिरामी हुने गरेको पाइएको छ ।
किट अभाव
जिल्लामा डेगुं र भाइरल ज्वरोका बिरामी दिनहु बढ्दै जाँदा सरकारले भने खासै चासो दिएको देखिन्न । डेंगुका बिरामी बढ्दै गर्दा चेकजाँचका लागि चाहिने आवश्यक किट सरकारले पठाउन सकेको छैन् । सरकारले किट नपठाएपछि अस्पताल विकास समितिले खरिद गरेर ल्याएको किट न्युनतम शुल्क लिएर परीक्षण गर्ने गरेको मेसु झाले बताए ।
उक्त किट प्रदेश सरकारले बढीमा ६ सयसम्म लिन सक्ने व्यवस्था गरेपनि अस्पतालमा चार सय रुपैँया लिएर परीक्षण गर्ने गरेको उनले सुनाए । मेसु झाका अनुसार पद्रेशबाट पर्याप्त मात्रामा किट नआउँदा डेंगु बिरामी पत्ता लगाउन गाह्रो भइरहेको छ ।
अत्याधिक ज्वरोका कारण डेंगुको परीक्षण गर्नेको संख्या दैनिक बढ्ने गरेको उनले बताए । केहीदिनअघि ल्याइएको १ सय ५० थान किट ३/४ दिनअघि नै सकिएपछि थप किटको माग गरेर पनि नआएको उनले बताए ।
उता स्वास्थ्य कार्यालयले सबै स्थानीय तहलाई सचेत भएर रोकथामका लागि योजना बनाउन आग्रह गरेको छ । डेंगुको मुख्य स्रोत लामखुट्टे भएकाले लामखुट्टेबाट बच्न सरसफाइमा ध्यान दिन आगह्र गरको छ । पानी जम्न नदिने,जामको पानी फालिहाल्ने,झुल टांगेर सुत्ने, बाहुला भएको लुगा लगाउन आग्रह गरिएको छ।
त्यस्तै स्थानीय तहहरूले लामखुटटे मार्ने विषादी छर्न (स्प्रे उपकरण) को प्रयोग गर्न पनि सुझाएको छ । जसअनुसार चौदण्डिगढी नगरपालिका, त्रियुगा नगरपालिकाले केही दिनयता डेंगु नियन्त्रणका लागि लामखुट्टे मार्ने उपकरणको प्रयोग गर्दै गाईघाट बजारलगायत विभिन्न वडा पुगेर औषधि छर्ने काम गरिरहको जनाएको छ ।
अन्य स्थानीय तहले पनि लामखुट्टे मार्ने उपाय अपनाइरहेको स्वास्थ्य कार्यालयले जनाएको छ ।
प्रतिक्रिया दिनुहोस !
