अष्ट्रेलिया : इंग्ल्यान्ड आयोजक राष्ट्र अस्ट्रेलियालाई पराजित गर्दै महिला विश्वकप फुटबलको फाइनलमा प्रवेश गरेको छ।
सिड्नीस्थित स्टेडियम अस्ट्रेलियामा बुधबार भएको खेलमा घरेलु टिम अस्ट्रेलियालाई ३-१ गोलअन्तरले पराजित गर्दै इंग्ल्यान्ड पहिलो पटक महिला विश्वकप फुटबलको फाइनलमा प्रवेश गरेको हो। इंग्ल्यान्डका लागि इल्ला टुन, लौरेन हेम्प र अलेसिया रुसोले गोल गरे। यता, अस्ट्रेलियाका लागि साम केरले गोल फर्काइन्।
खेलको ३६औँ मिनेटमा इल्लाले गोल गर्दै इंग्ल्यान्डलाई १-० गोलको अग्रता दिलाइन्। उनकै गोलमा इंग्ल्यान्डले पहिलो हाफसम्म १-० गोलको अग्रता बनाएको थियो। खेलको ६३औँ मिनेटमा सामले उत्कृष्ट गोल गर्दै अस्ट्रेलियालाई १-१ गोलको बराबरीमा ल्याइन्। तर बाँकी समयमा अस्ट्रेलियाले दुई गोल खान पुग्यो।
खेलको ७१औँ मिनेटमा लौरेनले गोल गर्दै अस्ट्रेलियाविरुद्ध इंग्ल्यान्डलाई २-१ गोलको अग्रता दिलाइन्। खेलको ८६औँ मिनेटमा एलेसियाले गोल गर्दै इंग्ल्यान्डलाई ३-१ गोलको जित दिलाइन्।
यो जितसँगै इंग्ल्यान्डले अब उपाधिको लागि फाइनलमा स्पेनसँग प्रतिस्पर्धा गर्नेछ। स्पेन र इंग्ल्यान्डबीचको खेल २० अगस्टमा सिड्नीस्थित स्टेडियम अस्ट्रेलियामा हुनेछ। स्पेनले स्वीडेनलाई सेमिफाइनलमा पराजित गर्दै यसअघि नै फाइनलमा स्थान बनाएको हो। त्यस्तै अस्ट्रेलियाले स्वीडेनविरुद्ध तेस्रो स्थानको लागि ब्रिसबनमा प्रतिस्पर्धा गर्नेछ।
प्रतिक्रिया दिनुहोस !
