बेनी : म्याग्दीको अन्नपूर्ण गाउँपालिका–३ फगामको २२० केभी क्षमताको प्रसारण लाइनको टावर पहिरोको उच्च जोखिममा परेको छ। कालीगण्डकी कोरिडोरअन्तर्गतको दाना–खुर्कोट प्रसारण लाइन आयोजनाअन्तर्गत फगामको गम्फु भन्ने ठाउँमा रहेको टावर पहिरोका कारण ढल्ने अवस्थामा पुगेको हो।
गाउँपालिकाका उपाध्यक्ष दिवा तिलिजा पुनले गुइठे भिरको पहिरोसँगै टावर ढल्ने अवस्थामा रहेको जानकारी दिइन्। ‘बेनी–जोमसोम–कोरला सडकदेखि टावर रहेको जमिनसम्म पहिरो पुगिसकेको छ,’ उनले भनिन्, ‘तत्काल पहिरो नियन्त्रण नगर्ने हो भने उच्च गतिको विद्युत् प्रवाह भइरहेको टावर ढल्ने अवस्थामा छ।’
जिल्ला प्रशासन कार्यालयमार्फत नेपाल विद्युत् प्राधिकरणलाई टावरको अवस्थाको विषयमा जानकारी गराए पनि प्राधिकरणले गम्भीर रूपमा नलिएको जनप्रतिनिधिले गुनासो गरेका छन्। प्रसारण लाइनको टावरदेखि तल गुइठेको भिरमा ठूलो पहिरो खसेका कारण टावर उच्च जोखिममा परेको हो। स्थानीयले त्रिपाल हालेर टावरमुनिको जमिनलाई ढाकेका छन्। टावरको वरपर पनि पहिरो खसेको छ।
म्याग्दीका प्रमुख जिल्ला अधिकारी तुलसीराम पौडेलले विद्युत् प्राधिकरणलाई पहिरोले जोखिममा परेको टावरको अवस्था जानकारी गराइसकेको बताए। पहिरो रोकथाम गरी क्षति हुन नदिनका लागि काम गर्न प्राविधिकसहितको टोली बोलाएको प्रजिअ पौडेलले जनाए।
पहिरोका कारण प्रसारण लाइनको टावर ढलेमा हुने सम्भावित दुर्घटनाका कारण स्थानीय त्रसित भएका हुन्। बेनी–जोमसोम सडकदेखि करिब सात सय मिटर माथि टावर छ। टावर वरपरको पाखोबाट निरन्तर खसिरहेको पहिरोका कारण गुइठेमा बेनी–जोमसोम अवरुद्ध हुने गरेको बेनी–जोमसोम–कोरला सडक आयोजनाका प्रमुख जगत प्रजापतिले बताए। ‘गुइठे, जलथले, दुवारी, खामभित्ताको करिब दुई किलोमिटर सडकमा ५० भन्दा बढी पहिरो खसेको छ,’ उनले भने ‘कालीगण्डकीको कटान र शाखा सडकबाट सिर्जना भएको पहिरोले बेनी–जोमसोम सडकमा यातायात सञ्चालन गर्न समस्या भएको छ।’
भदौ २ गते यता जलथले–दुवारी खण्डमा चार डोजर परिचालन गरेर बुधबार बिहानदेखि यातायात सञ्चालन गरिएको छ। सडक खुलेपछि जलथले र दाना क्षेत्रमा रोकिएका सवारी साधनहरू गन्तव्यतर्फ लागेका छन्।
सडक मर्मतका क्रममा गुइठेको भिरबाट खसेको ढुंगाले चोट लागेर सडक विभागका डोजर अपरेटर नारायण गिरी र सवारी चालक सुभाष कुमाल घाइते भएको आयोजना प्रमुख प्रजापतिले जानकारी दिए।
प्रतिक्रिया दिनुहोस !
