बेनी : म्याग्दीमा सुन्तला र मुस्ताङमा स्याउलाई भण्डारण गरेर बेमौसममा बजारमा आपुर्ति गराउन यस वर्ष २५ हजार किलोग्राम क्षमताको तीन वटा चिस्यान गृह निर्माण भएको छ ।
प्रधानमन्त्री कृषि आधुनिकिकरण परियोजना अन्तर्गत म्याग्दीमा एक र मुस्ताङमा दुई वटा चिस्यान गृह निर्माण भएको हो । स्याउ र सुन्तलाको व्यवसायिक कृषि उत्पादन तथा प्रशोधन केन्द्र (जोन) कार्यक्रमको सहयोगमा चिस्यानगृह निर्माण भएका परियोजनाका कृषि अधिकृत बिक्रम बस्यालले बताए ।
‘निजी फार्म, कृषक समूह र सहकारीहरुले चिस्यानगृह बनाउन कुल लागतको ८५ प्रतिशत सम्म अनुदान दिइएको छ,’ उनले भने ‘चिस्यानगृहमा कृषकले सुन्तला र स्याउलाई भण्डारण गरेर बेमौसममा बढी मूल्यमा बेच्नेछन् ।’
बेनी नगरपालिका–९ को बियाडामा परियोजनाको १० लाख रुपैयाँ अनुदानमा पाँच हजार किलोग्राम क्षमताको सुन्तला भण्डारण गर्ने चिस्यान गृह निर्माण भएको छ । मुस्ताङको घरपझोङ गाउँपालिकाको मार्फामा हाइल्याड एग्रो फार्म र बारागुङ मुक्तिक्षेत्र गाउँपालिकाको खिङ्गामा जिआर अर्गानिक एग्रो स्याउ फार्ममा १०/१० हजार किलोग्राम क्षमताको चिस्यान गृह निर्माण भएको छ ।
मार्फाको चिस्यानगृह बनाउन ११ लाख तीन हजार रुपैयाँ र खिङ्गामा ११ लाख २८ हजार रुपैयाँ अनुदान दिएको कृषि अधिकृत बस्यालले जानकारी दिए । वातावरण अनुकुल बनाउन उपकरण जडान भएको चिस्यानगृहमा भण्डारण गर्दा बजार नपाउने समस्या हट्नुका साथै बढी मूल्यमा बिक्री गर्न पाइने बेनी नगरपालिका–९ बियाडाका मधु गिरीले बताए ।
परियोजनाको सहयोगमा आर्थिक वर्ष २०७६/७७ मा ५ टन क्षमताको एक वटा, २०७७/०७८ मा ४२ टन क्षमताको तीन वटा, आर्थिक वर्ष २०७८/७९ मा ३० टन क्षमताको तीन वटा चिस्यान गृह निर्माण भएका छन् । यसअघि मुस्ताङको मार्फा, पाण्डाखोला, जोमसोम, चिम्ले, धवाङ र म्याग्दीको नारच्याङमा निर्माण भएका निस्यानगृह प्रभावकारी बनेका छन् ।
परियोजनाले मुस्ताङमा स्याउ, च्याङग्रा, म्याग्दीमा बंगुर, आलु, म्याग्दी, पर्वत र बागलुङमा सुन्तलाको जोन कार्यक्रम सञ्चालन गरेको छ । गत वर्ष म्याग्दी, पर्वत र बागलुङमा सुन्तला जोनको २१ लाख ४२ हजार रुपैयाँ अनुदानमा निर्माण भएका १८ वटा साना सिचाई योजनाबाट १२५ रोपनीमा सिचाई सुविधा विस्तार भएको छ ।
आठ लाख पचास हजार रुपैयाँ अनुदानमा बेनी नगरपालिका–३ मा दुई वटा र पर्वतको जलजला गाउँपालिका–५ मा एक वटा सुन्तला नर्सरी स्थापना भएको छ । मुस्ताङमा २.१६ हेक्टरमा स्याउ खेति विस्तार भएको र म्याग्दीमा दुई हजार दुई सय सुन्तलाका बिरुवा अनुदानमा वितरण गरेको कृषि अधिकृत बस्यालले जानकारी दिए ।
प्रतिक्रिया दिनुहोस !
