उदयपुर : स्थानीय सरकार सञ्चालन र ब्यवस्थापनसम्बन्धी कानुनी व्यवस्थाबारे जानकारी गराउने उद्देश्यले उदयपुरको त्रियुगा नगरपालिकाले जनप्रतिनिधि र कर्मचारीलाई प्रशिक्षण दिएको छ।
नगरपालिकाले जनप्रतिनिधि र कर्मचारीका लागि नेतृत्व विकास, सकरात्मक सोच र नगरपालिका सञ्चालन विधिसम्बन्धी प्रशिक्षण दिएको हो। जनप्रतिनिधि र कर्मचारीको काममा एकरुपता ल्याउन, अधिकार र जिम्मेवारीका बारेमा स्पष्ट गराउन प्रशिक्षण आयोजना गरिएको मेयर वसन्तकुमार बस्नेतले जानकारी दिए।
जनप्रतिनिधिलाई आफ्नो अधिकार र कर्तव्यअन्तर्गत कानुनी व्यवस्थाका बारेमा जानकारी गराउँदा कार्य सम्पादनमा भिन्नता ल्याउने, सभा सञ्चालनमा स्पष्टता हुने, नागरिकलाई प्रभावकारी तथा छिटोछरितो कसरी सेवा प्रवाह गर्ने र सामुहिक जवाफदेही बनाउने लक्ष्य राखिएको उनले बताए।
कार्यक्रममा योजना तर्जुमा, बजेट प्राथमिकीकरण तथा कार्यान्वयन सीप, स्थानीय सरकारको अधिकार र कानून निर्माण प्रक्रिया तथा अभ्यास र व्यक्तित्व विकास, आत्म विकास, नेतृत्व सीप, नैतिकता र सदाचारका विषयमा संविधानविद् काशीराज दाहाल र स्थानीय शासन विज्ञ तथा पूर्व प्रमुख सूचना आयुक्त कृष्णहरी बास्कोटाले प्रशिक्षण दिएको उपमेयर महेश्वरी राईले बताइन्।
प्रशिक्षकहरूले संघीय लोकतान्त्रिक संविधान र स्थानीय सरकार तहगत सरकारको समन्वय तथा अन्तर सम्बन्ध, लोकतन्त्र र संघियताको विश्व अभ्यास र नेपालका विषयमा पनि प्रशिक्षण दिएको उनले बताइन्।
प्रतिक्रिया दिनुहोस !
