नक्कली नेपाली नोटसहित एकजना पक्राउ
काठमाडौं : काठमाडौं उपत्यका अपराध अनुसन्धान कार्यालयको प्रहरी टोलीले नेपाली नक्कली नोटसहित एक जनालाई पक्राउ गरी आज सार्वजनिक गरेको छ।
पक्राउ पर्नेमा गोरखा जिल्लाको गोरखा नगरपालिका-४ धारापानी घर भई हाल काठमाडौं नागार्जुन नगरपालिका-८ भीमढुङगा बस्ने ३८ वर्षीय गौरव थापा रहेका काठमाडौं उपत्यका अपराध अनुसन्धान कार्यालयका प्रवक्ता तथा प्रहरी उपरीक्षक रवीन्द्र रेग्मीले जानकारी दिए।
उनका अनुसार काठमाडौं महानगरपालिका-१५ स्वयम्भू क्षेत्रमा नक्कली नेपाली नोटको कारोबार भइरहेको छ भन्ने सूचनाका आधारमा कार्यालयबाट खटिएको विशेष प्रहरी टोलीले एक लाख (एक हजार दरका एक सय थान) नक्कली नेपाली नोटसहित उनलाई पक्राउ गरिएको हो।
पक्राउ परेका थापालाई आवश्यक कारबाहीका लागि जिल्ला प्रहरी परिसर काठमाडौं पठाइएको उपत्यका अपराध अनुसन्धान कार्यालय मीनभवनले जनाएको छ।