राजनीतिक मुद्दालाई न्यायिक क्षेत्रमा प्रवेश गराउनु हुँदैन : उपेन्द्र यादव

विराटनगर : जनता समाजवादी पार्टी (जसपा)का अध्यक्ष उपेन्द्र यादवले अहिलेको मुलुकको संसदीय प्रणालीमा पुर्नविचार आवश्यक रहेको धारणा राखेका छन् ।  विराटनगर विमानस्थलमा सोमबार सञ्चारकर्मीसँग संक्षिप्त प्रतिक्रिया दिँदै उनले मुलुकमा अहिलेको अवस्था आउनुमा संसदीय प्रणाली दोषी रहेको बताए ।

'अहिलेको संसदीय प्रणाली मै दोष छ । हामीले अभ्यास गरिरहेको संसदीय व्यवस्थामा पुर्नविचार गर्न आवश्यक छ । यसकै ‘डिफेक्ट’ले जटिल अवस्था सृजना भएको हो,’यादवले भने । उनले कोसी प्रदेश सरकारलाई स्थायित्व दिन प्रमुख राजनीतिक दलहरू जिम्मेवार रहेको उल्लेख गरे । 

प्रदेशमा जनताको उन्नति,आर्थिक विकास र समृद्धिका लागि दलहरूबीचमा आपसी सहमति एवं सहकार्य आवश्यक रहेको यादवको भनाइ छ । ‘संसदीय व्यवस्थामा बहुमत हुने दलले सरकार चलाउने र नहुँदा मध्यावधिमा जानुपर्ने थियो,’उनी भन्छन्,‘यी दुवै कुरा कोसी प्रदेशमा हुन सकेन ।’ 

उनले संवैधानिक व्यवस्थामै पुर्नविचार आवश्यक रहेको जिकिर समेत गरे । ‘संसदीय व्यवस्थामा बहुमत हुने दलले सरकार चलाउने हो । बहुमत नपुग्दा मध्यावधिमा जाने हो । यो त संसदीय व्यवस्थामा प्रस्ट छ । तर, यहाँ पाँच चरण (स्टेप)मा पुगेर मात्रै जाने कुरा प्रक्रिया अपनाइयो । त्यो त्रुटिपूर्ण छ,’यादवले भने । 

प्रदेशमा कुनैपनि दलको स्पष्ट बहुमत नभएका कारण सरकार नै अन्योलपूर्ण बन्दै गरेको स्वीकार गर्दै उनले प्रदेशको समस्या समाधानमा दलहरूबीच आपसी सहमति र सहकार्य आवश्यक रहेको बताए । 
राजनीतिक मुद्दाले न्यायिक क्षेत्रमा स्थान पाउनु आफैमा दुःखद् भएको उनको भनाइ छ । 

‘राजनीतिक मुद्दाहरुले न्यायिक क्षेत्रमा प्रवेश पाउनु हुँदैन,’यादवले भने,‘दल तथा नेताहरूले नै समाधान खोज्नुपर्छ ।’उनले राजनीतिक मुद्दाको छिनोफानो गर्ने दायित्व दलहरू कै हुने बताए । मुलुकको निर्वाचन प्रणाली र संसदीय व्यवस्थामाथि दोष थोपर्दै उनले अहिलेको शासकीय स्वरुप,निर्वाचन प्रणाली र संसदीय संरचना फेरबदल गर्न जरुरी रहेको उल्लेख गरे ।