नेम्वाङलाई स्मरण गर्दै नेपालले भने : असहज परिस्थितिमा भएका सहकार्य र भूमिकाप्रति उच्च सम्मान

काठमाडौं : पूर्वप्रधानमन्त्री एवम् नेकपा एकीकृत समाजवादीका अध्यक्ष माधवकुमार नेपालले एमालेका उपाध्यक्ष सुवासचन्द्र नेम्वाङको असामयिक निधनले स्तब्ध बनाएको बताएका छन्। नेम्वाङप्रति श्रद्धान्जली दिँदै नेपालले असहज परिस्थितिमा भएका सहकार्य र भूमिकाप्रति उच्च सम्मान व्यक्त गर्दै स्तब्ध भएको बताएका हुन्। 

नेम्वाङले लिएको पहलकदमी, दिएको योगदान, नेतृत्व र समन्वयका अनेकन पहलहरू मानसपटलमा ताजै रहेको उनको भनाई छ। ‘संविधानसभाका अध्यक्ष, नेकपा (एमाले)का उपाध्यक्ष, प्रतिनिधिसभाका सदस्य एवम् म सँग लामो राजनीतिक सहकार्य गर्नभएका कमरेड सुवासचन्द्र नेम्वाङको असामयिक निधन भएको खबरले स्तब्ध बनायो। एक निडर र इमान्दार राजनीतिकर्मीका रूपमा रूपमा विद्यार्थी राजनीति हॅुदै कोअर्डिनेशन केन्द्र, नेकपा (माले) र नेकपा (एमाले) पार्टी निर्माण एवम् विस्तारमा उहॅाले लिनुभएको पहलकदमी, खेल्नुभएको भूमिका, दिनुभएको योगदान, नेतृत्व र समन्वयका अनेकन पहलहरू मेरो मानसपटलमा ताजै रहेका छन्।’
 

समाजको रूपान्तरण, संविधानको रक्षा र विधिको शासन स्थापना गर्दै नेम्वाङले समुन्नत राष्ट्र बनाउन सिंगो जीवन नै संघर्षमा होमिएको नेपालको भनाई छ। उनले भने,‘केवल पार्टी निर्माणमा मात्र नभई व्यवस्था परिवर्तन, समाजको रूपान्तरण, संविधानको रक्षा र विधिको शासन स्थापना गर्दै नेपाललाई समुन्नत राष्ट्र बनाउन सकिन्छ भन्ने मान्यता सहित सिंगो जीवन नै संघर्षमा होम्नुभएका कमरेड नेम्बाङसँग राजनीतिक र सामाजिक जीवनका अनेकौं सहज एवम् असहज परिस्थितिमा भएका सहकार्यहरू संझिएको छु र उहॅाको भूमिका प्रति उच्च सम्मान प्रकट गर्दछु।’

अकल्पनीय रूपमा भएको निधनलाई देखेर भारी मनसहित श्रद्धान्जली दिएको उनले बताए। ‘कमरेड नेम्वाङको पार्थिक शरीर भएको स्थान त्रि.वि. शिक्षण अस्पताल र उहॅाको निवासमा पुगेर पार्थिक शरीर एवम् परिवारजनलाई भेटेर भर्खर फर्किदै छु, जन्मपछि मुत्यु सास्वत सत्य भएपनि अकस्मात र अकल्पनीय रूपमा भएको निधनलाई देखेर भारी मन सहित लेख्दैछु ‘हार्दिक श्रद्धान्जली कमरेड सुवास’!शोक सन्तप्त परिवारजनमा गहिरो समवेदना !’