काठमाडौं : पञ्चायत कालदेखि नै महिला अधिकारको क्षेत्रमा सक्रिय योगदान पुर्याएकी मुक्तमाया बास्तोलाको बुधबार काठमाडौंमा निधन भएको छ।
१९९३ सालमा खनार-४, सुनसरीमा जन्मिकी बास्तोला विवाहपछि इटहरी नगरपालिका-१२ मा रही राजनीति एवं सामाजिक कार्यमा सक्रिय रहिन्। खनार-४ मा रहेको शारदा माविको सञ्चालक समितिमा रहेर शिक्षा क्षेत्रमा पनि उनले महत्वपूर्ण योगदान पुर्याएकी छन्।
बास्तोलाले २०३५ सालदेखि २०४६ सालसम्म खनार गाउँ पञ्चायतको महिला संगठनको निर्विरोध निर्वाचित महिला सभापतिका रूपमा सक्रिय भूमिका निभाइन्। नेपालमा बहुदलीय प्रजातन्त्र आएपछिका दिनहरूमा पनि उनले नेपाली महिलाको हक अधिकारको आन्दोलनमा आफूलाई निरन्तर सक्रिय तुल्याइन्।
महिला नेत्री बास्तोलाको निधनमा आफ्नो फेसबुकमार्फत श्रद्धाञ्जली व्यक्त गर्दै कोशी प्रदेश सभाका सांसद रोहित कार्कीले उनी खनार बासीको ढुकढुकी रहेको बताए।
उनले नेत्री बास्तोलाले लामो समय महिला संगठनको सभापति भई जनताको सेवा गर्नुका साथै धर्ममा पनि आस्था राखी खनारको शिव मन्दिरको स्थापनामा सहयोग गर्नुका साथै आजीवन सदस्य रहेकी जनाए। उनी राष्ट्रिय खेलाडी स्व.शम्भु बास्तोलाकी आमा हुन्।
प्रतिक्रिया दिनुहोस !
