धनगढीका २०९ जना जेष्ठ नागरिक स्वास्थ्यकर्मीसहित तिर्थयात्रामा (फोटो फिचर)
असोज ८, २०८० सोमबार ११:५९:३२
धनगढी : धनगढी उपमहानगरपालिका वडा नम्बर २ का ज्योति विष्टको मुहारमा खुसीयाली थियो । जीवनको उत्तरार्द्धमा मुस्ताङको मुक्तिनाथ धाम जाने तयारीमा उनी थिए । धनगढीबाट मुक्तिनाथका लागि आतेजाते भण्डै ३० हजार जती खर्च लाग्छ । ‘खाना बस्न, यातायात सबै निशुल्क छ,अझ लौरो पनि दिएको छ । जीवनको उत्तरार्द्धमा भगवान विष्णुको दर्शन गर्न पाउने भएँ, खसी छु,'विष्टले भने ।
धनगढी उपमहानगरपालिका -१८ फुलबारी (डिपोबजार) का यज्ञप्रसाद आचार्य बसको सीटमा बसिसकेका थिए । ‘स्थानीय सरकार हाम्रो पनि रहेछ भन्ने भान भयो । उपमहानगरको सिंगो टीम र विषेशगरी मेयर गोपाल हमाललाई धन्यवाद दिन चाहन्छु, जेष्ठ नागरिकको सम्मान गरेकोमा, 'विष्टले भने ।
धनगढी उपमहानगरपालिका वडा नम्बर १ की कृष्ण देवी उपाध्याय छोरासँगै धनगढी उपमहानगरपालिकको परिसरमा पुगेकी थिइन् । ‘स्थानीय सरकारले छोराहरूले गर्न नसकेको काम गर्यो,मेयरसहित सबैलाई हाम्रो आशिस लागोस् । यस उमेरमा मुक्तनाथ गएर मुक्ति पाउने भए,'उपाध्यायले भनिन् ।
धनगढी उपमहानगरपालिकाले २०९ जना जेष्ठ नागरिकलाई मुक्तिनाथको दर्शनका लागि आइतबार मुस्ताङ पठाएको छ । जीवनभरी घरधन्दामै सिमित रहेका,आर्थिक अवस्थाका कारण धार्मिक यात्रा गर्न नपाएका जेष्ठ नागरिकलाई उपमहानगरले मुक्तिनाथ दर्शनका लागि पठाएको हो ।
गण्डकी प्रदेशको मुस्ताङ जिल्लामा रहेको मुक्तिनाथ दर्शनका लागि धनगढी उपमहानगरले २०९ जना जेष्ठ नागरिकको आइतबार धनगढीबाट विदाइ गरेको छ । खाना, बस्न र यातायातको सुविधासहित २०९ जना जेष्ठ नागरिकहरु आइतबार २ बजे, धनगढीबाट मुक्तिनाथका लागि प्रस्थान गरेका छन् ।
धनगढी उपमहानगरपालिका वडा नम्बर १८ की धनमाया बास्कोटा भन्छिन्,‘उपमहानगर पालिका हाम्रो छोरो जस्तै भयो । बा-आमालाई छोराहरूले तीर्थ गराउने हो तर नगरपालिकाले छोराजस्तै तीर्थ गराइ दियो, सबैलाई हाम्रो आशिस लागोस्,'७१ वर्षीया धनमायाले भनिन् ।
हिन्दुले मुक्तिनाथमा गएर विशेष रुपमा विष्णु भगवान्को पुजा गर्ने गर्छन् । हिन्दु धर्मअनुसार मुक्ति प्राप्तिको लागि ब्रह्मणले योगरुप यज्ञ गरेको र त्यसबाट सृष्टि गर्ने शक्ति पाएको भन्ने मान्यता रहेको छ । मुक्ति नाथमा रहेका १२२ धारामा नुहाए पाप नास् हुने धार्मिक मान्यता छ ।
धनगढी उपमहानगर–५ तारानगरका तुल्सीधर जोशी भन्छन्,‘मर्ने बेला मुक्ति पाइने भयो, तीर्थ गरेर भगवान विष्णुको दर्शन हुने भयो । उपमहानगरलाई धन्यवाद ।’ जेष्ठ नागरिहरू एक साताका लागि मुक्तिनाथ यात्रामा निस्किएका हुन् ।
उपमहानगरले आफ्नो वार्षिक नीति तथा कार्यक्रममै ‘ज्येष्ठ नागरिकलाई तीर्थयात्रा’ कार्यक्रम समावेश गरेको छ । उपमहानगरल गतवर्ष पनि १ सय २२ सय जना जेष्ठ नागरिहहरू मुक्तिनाथको दर्शनका लागि पठाएको थियो ।
नगरबासीमा ज्येष्ठ नागरिकलाई नयाँ पुस्ताले सम्मान गर्नुपर्छ भन्ने भावनाको विकास गर्न र जेष्ठ नागरिकहरुलाई पनि स्थानीय सरकारको अनुभूति दिलायनका लागि उनीहरूलाई तीर्थयात्रामा पठाइएको नगर प्रमुख गोपाल हमालले बताए ।
‘भौतिक पूर्वाधारको निर्माण क्रमश हुने कुरा नै हो, तर नगरका जेष्ठ नागरिकलाई सम्मान दिन,स्थानीय सरकार पनि छ है भन्ने अनुभूति दिलाउन र युवा पुस्तालाई जेष्ठ नागरिकलाई जीवनको उत्तरार्द्धधमा तीर्थब्रत गराइए दिनुपर्छ भन्ने संस्कारको विकास गर्न यस्तो गरिएको हो,' मेयर हमालले भने ।
जेष्ठ नागरिकहरुका लागि वातानुकुलित बस, ५ वटा बसमा एक/एक जना स्वास्थ्यकर्मीको समेत व्यवस्था गरिएको छ। उपमहानगरले तीर्थयात्रामा गएका नागरिकलाई मुक्तिनाथसहित कागवेनी, पोखरा, देवघाट र नवलपरासीको कैवल्यधामको भ्रमण गराउने महानगरपालिकाले जनाएको छ।
प्रतिक्रिया दिनुहोस !
