कर्णालीमा एमाले अधिवेशन : जुटेन सहमति, निर्वाचनका लागि कार्यतालिका सार्वजनिक

वीरेन्द्रनगर : नेकपा एमालेको कर्णाली प्रदेश अधिवेशन निर्वाचनमा जाने संकेत देखिएको छ । बुधबारदेखि सुरू भएको प्रदेश अधिवेशनमा सहमतिमा नेतृत्व चयन गर्नका लागि प्रयास गरेपनि सहमति नभएपछि अन्तत: निर्वाचनमा लाने अवस्थामा पुगेको हो । 

अन्तिममा आएर नेकपा एमालेका पोलिटब्यूरो सदस्य गुलावजंग शाह र प्रदेश कमिटी सदस्य मीनबहादुर शाहीबीच चुनावी प्रतिस्पर्धा हुने लगभग पक्कापक्कीजस्तै भएको छ ।

एक नेताले भने,'प्रदेश अधिवेशन सहमतिमा गर्ने मुख्य नेताहरूको पहल निकै भएको हो । तर, अब सम्भव नहुने अवस्थामा आइपुगेको छ । सायद अब निर्वाचन हुन्छ । निर्वाचनमा प्रदेश अध्यक्षका लागि पार्टीका नेताहरू शाह र शाहीले स्वस्थ प्रतिस्पर्धा गर्नुहुन्छ । '

निर्वाचन कार्यतालिका सार्वजनिक 

सहमतिबाट नेतृत्व चयन गर्न नसकिएपछि एमाले प्रदेश अधिवेशनमा निर्वाचनका  लागि केन्द्रीय निर्वाचन आयोगले निर्वाचन कार्यतालिका सार्वजनिक गरेको छ । निर्वाचन आयोगका अनुसार शुक्रबार दिउँसो ३ बजे सबै प्रतिनिधिहरूको नामावली प्रकाशन, ३ : ३० बजेबाट दावी विरोध, ४ :३० बजे अन्तिम नामावली प्रकाशन, ४ : ३० बजेबाट उम्मेदवारी फारम वितरण, ४ : ३० बजेदेखि ६ : ३० बजेसम्म उम्मेदवारी दर्ता, बेलुका ७ बजेसम्म नामावली प्रकाशन, ७ देखी ७ : ३० बजेसम्म दाबी विरोध, ९ :३० बजे अन्तिम नामावली प्रकाशन गर्ने कार्यतालिकामा उल्लेख छ।  कार्यतालकाअनुसार  ९ : ३० बजेदेखि शनिबार बिहान ८ : ३० बजेसम्म उम्मेदवारी फिर्ताको समय,शनिबार दिउसो १२ : ३० बजेदेखि साँझ ६ बजेसम्म मतदानको समय निर्धारण गरिएको छ । 

निर्वाचन आयोगले प्रदेश कमिटीका लागि निर्वाचन कलष्टर पनि छट्याएको छ । प्रदेश सभामा २४ निर्वाचन क्षेत्र रहेको कर्णालीमा अध्यक्ष एक, उपाध्यक्ष एक, सचिव एक, उपसचिव दुई जना गरेर ५ पदाधिकारी र १ सय २५ सदस्यको कलष्टर तय गरेको हो । 

निर्वाचन आयोगका अनुसार हरेक प्रदेश निर्वाचन क्षेत्रबाट २ जना पुरुष,एक जना महिला गरी ७२ जना, दलिय सदस्य खुला १५ जना, ४० वर्ष मुनिका ३ पुरुष एक महिला, जनजाति ८ जना, ४० वर्ष मुनिका १ पुरुष, एक महिला, खुला सदस्य २९ जनामा ४० वर्ष मुनिका ४ पुरुष २ महिला गरी जम्मा प्रदेश कमिटीमा ४१ जना महिला र ८१ पुरुष गरी १ सय ३० जनाको पदमा निर्वाचन हुनेछ।