१४१ जना ज्येष्ठ नागरिकको उपचार

नुवाकोट : नुवाकोटको देवीघाटमा सोमबार ज्येष्ठ नागरिकको स्वास्थ्य परीक्षण गरिएको छ। स्वास्थ्य परीक्षण गरी आवश्यक औषधि निःशुल्क वितरणसमेत गरिएको छ। 

ज्येष्ठ नागरिकहरू प्रेरणाको स्रोत र समाजको मार्गदर्शक भएका कारण उनीहरूको विदुर नगरपालिका-५ स्थित देवीघाट ज्येष्ठ नागरिक संरक्षण तथा अध्ययन प्रतिष्ठानमा स्वास्थ्य परीक्षण शिविर गरिएको हो। सो अवसरमा प्रतिष्ठानमा रहेका र अन्य ज्येष्ठ नागरिकको स्वास्थ्य परीक्षण गरिएको आयोजक प्रतिष्ठानले जनाएको छ।
 

सो अवसरमा एक सय ४१ जना ज्येष्ठ नागरिकको स्वास्थय परीक्षण गरी आवश्यक औषधि निःशुल्क वितरण गरिएको त्रिशुली अस्पतालका अध्यक्ष राजु पण्डितले जानकारी दिए। उनका अनुसार प्रतिष्ठानमा आश्रित ४५ जनासहित देवीघाट, पिपलटार, फिर्केप, जिलिङ आसपासका एक सय ४१ जना वृद्धवृद्धाको स्वास्थ्य परीक्षण गरिएको हो। शिविरमा त्रिशुली अस्पतालका प्रमुख डा. प्रतिक सिंहसहित आठ जना चिकित्सकका साथ २० जनाको स्वास्थय टोलीले वृद्धवृद्धाको स्वास्थ्य परीक्षण गरेको थियो।