जोमसोम : मुस्ताङको उत्तरी सिमावर्ती क्षेत्र चीनको तिब्बत भूमी प्रस्थान/प्रवेश अनुमतिपत्र वितरणका लागि जोमसोमबाट कर्मचारी खटिएका छन् । इलाका प्रशासन कार्यालय लोमान्थाङमा शाखा अधिकृत तहको कार्यालय प्रमुखविहीन हुँदा सेवा प्रवाह प्रभावित छ ।
यसैका कारण जिल्ला प्रशासन कार्यालयबाट इलाका प्रशासन कार्यालय लोमान्थाङमा बोर्डर पास वितरण गर्न कर्मचारी खटाउनु परेको हो । जिल्ला प्रशासन कार्यालय मुस्ताङले ३ दिनअघि गृह मन्त्रालयले पठाएको नमूना बोर्डर पास प्रेसमा छपाइ गरेको थियो । सोही बोर्डर पास लिएर नायब सुब्बा रवि पुनसहित ४ जना कर्मचारीहरू इलाका प्रशासन कार्यालय लोमान्थाङ पुगेका हुन् । उनीहरुले मंगलबरदेखि बोर्डर पास वितरणको प्रक्रिया अघि बढाएका छन् ।
कोभिड र सुरक्षा संवेदनशीलताका कारण चीनले एकतर्फी रुपमा बन्द गरेको कोरलानाका खुल्ने र तिब्बती बजारमा पुगर मालसामान किनमेल गर्न पाइने खबरले उपल्लो मुस्ताङबासी निकै उत्साहित छन् । छिटो बोर्डर पास बनाएपछि चीनले उत्तरी कोरलानाकाको ढोका खुल्ला गरिदिने उपल्लो मुस्ताङबासीको अपेक्षा छ ।
यसैले मंगलबार पहिलो दिननै इलाका प्रशासन कार्यालय लोमान्थाङमा उपल्लो मुस्ताङीको निकै भीडभाड देखिन्थ्यो । जिल्ला प्रशासनले माग गरेको आवश्यक कागजात बोकेर उनीहरु इलाका प्रशासन कार्यालयमा पुगेका थिए । तर,सबै प्रक्रिया पुर्याए पनि उनीहरुले तत्कालै बोर्डर पास पाउन सकेनन् । लोमान्थाङका इलाका प्रशासन प्रमुखको दरबन्दी रिक्त रहेको र सहायाक प्रमुख जिल्ला अधिकारी बिदामा रहेकाले बोर्डर पास बनाउन गएकाहरू खाली हात फर्किए ।
बोर्डर पासको सेवा प्रवाहमा खटिएका नायब सुब्बा रवि पुनले मंगलबार पहिलोदिनमा ५० जनाले आवेदन दिएको जानकारी दिए । बोर्डर पास बनाउन आउनेहरू सबै लोमान्थाङ गाउँपालिका भित्रको रहेको बताए । उनीहरूको सबै कागजी प्रक्रिया भेरीफाइ पुरा गरी बोर्डर पास लिन मात्र बाँकी रहेको नायब सुब्बा पुनको भनाइ छ ।
उनले इलाका प्रमुख नभएकाले पासमा दस्तखत गर्न नमिल्ने भएकाले बोर्डर पास वितरण गर्न असमर्थ भएको बताए । ‘बोर्डर पास बनाउने सबैको कागजातको प्रक्रिया र दर्ताको काम भइरहेको छ,नायब सुब्बा पुनले भने,‘२/३ दिनपछि सिडियोसाप आउने कुरा छ ,उहाँ आएपछि बोर्डर पास वितरण हुन्छ ।’
उनले बोर्डर पास बनाउन आउनेमध्ये लोमान्थाङ २ र ४ का स्थानीय बढी रहेको उल्लेख गरे । इलाका प्रशासन कार्यालय लोमान्थाङमा शाखा अधिकृत तहको १ जना कर्मचारीसहित ७ जनाको स्थायी दरबन्दी छ । जसमध्ये २ जना नायब सुब्बा, १ जना लेखापाल ,१ जना सहायक कम्प्युटर अपरेटर र २ जना कार्यालय सहयोगीको दरबन्दी रहेको हो ।
तर, लामो समयदेखि त्यहाँ शाखा अधिकृत तहको इलाका प्रशासन प्रमुख र १ जना नायब सुब्बाको स्थान पदपूर्ति हुन सकेको छैन । यसैले पनि इलाका प्रशासन प्रमुख नहुँदा अन्य कर्मचारी हुनु र नहुनुको कुनै अर्थ नभएको प्रशासनको भनाइ छ ।
यसैले त्यहाँ तल्लो तहका कर्मचारीले जिल्ला प्रशासन कार्यालयमा अस्थायी मर्ज गरिएको थियो । २०७८ सालमा तत्कालीन इलाका प्रशासन प्रमुख देबेन्द्र पाण्डेपछि त्यहाँ इलाका प्रशासन प्रमुखविहीन भएको हो ।
प्रतिक्रिया दिनुहोस !
