रिगलको आममाफीविरुद्धको रिटमाथि सुनुवाइ भएन, कार्त्तिक १४ गतेलाई अर्को पेशी तोकियो

काठमाडौं : नेपालगञ्जका चेतन मानन्धरको हत्या अभियोगमा जन्मकैद पाएका रिगल भनिने योगराज ढकाललाई राष्ट्रपतिले आममाफी दिएकोविरुद्ध परेको रिटमा आज सुनुवाइ हुन सकेन।

पूर्ण इजलासमा रहेका प्रधानन्यायाधीश श्रेष्ठसहित तीनैजनाले आफूरहितको पूर्ण इजलासमा पठाउन आदेश दिएपछि सुनुवाइ नभएको सर्वोच्च अदालतका प्रवक्ता  भद्रकाली पोखरेलले  जानकारी दिए। 

उनका अनुसार अर्को पेशी कार्त्तिक १४ गतेलाई तोकिएको छ। अब यो रिटमाथि अर्को न्यायाधीशको पूर्ण इजलासमा अन्तिम सुनुवाइ हुनेछ।

बिहीबार बिहान सर्वोच्च अदालतको पूर्ण इजलासमा रिटको सुनुवाइ सुरू भएको थियो। पूर्ण इजलासमा प्रधानन्यायाधीश विश्वम्भरप्रसाद श्रेष्ठ,न्यायाधीशद्वय डा.आनन्दमोहन भट्टराई र कुमार रेग्मी रहेका छन्।

प्रधानन्यायाधीश श्रेष्ठले आफूसहित तीनैजना न्यायाधीशले यस्तै प्रकृतिको मुद्दामा यसअघि फैसला गरिसकेकाले सो रिट अर्को इजलासमा पठाउन आदेश दिएपछि रिटमाथि अन्तिम सुनुवाइ नभएको हो।

संविधान दिवसको अवसरमा प्रधानमन्त्री पुष्पकमल दाहाल 'प्रचण्ड' नेतृत्वको मन्त्रिपरिषदको सिफारिसमा राष्ट्रपति रामचन्द्र पौडेलले नेपालगञ्जका चेतन अधिकारीका हत्यारा रिगललाई आममाफी दिएका थिए। राष्ट्रपतिको सोही निर्णयविरुद्ध चेतन मानन्धरकी पत्नी भारती शेर्पा मानन्धरले रिगललाई फेरि कारागार पठाउन माग गर्दै सर्वोच्चमा रिट दिएकी थिइन्।

यसअघि असोज १८ गते सो रिटमाथि प्रारम्भिक सुनुवाइ गर्दै न्यायाधीश डा.मनोजकुमार शर्माको एकल इजलासले रिगललााई आममाफी दिनुको कारण सरकारलाई सोध्दै एक साताभित्र लिखित जवाफ मागेको थियो।

रिट निवेदनको टुंगो नलागेसम्म निवदेक तथा निजका परिवारका सदस्यलाई यथोचित सुरक्षा प्रदान गर्ने/गराउने आवश्यक व्यवस्था गर्न नेपाल सरकार,गृहमन्त्रालयलाई लेखी पठाउनू आदेशमा भनिएको छ। 

रिट निवेदनमा राष्ट्रपतिको कार्यालय,प्रधानमन्त्री तथा मन्त्रिपरिषद कार्यालय,गृहमन्त्रालय,जिल्ला प्रशासन कार्यालय बाँके,जिल्ला कारागार कार्यालय दाङ,जिल्ला प्रशासन कार्यालय दाङ र महान्यायाधिवक्ताको कार्यालय रामशाहपथ काठमाडौंलाई विपक्षी बनाइएको छ।

रिगलले खुकुरी प्रहार गरी २९ असार २०७२ सालमा २९ वर्षीय चेतन मानन्धरको हत्या गरेका थिए। त्यसपछि कर्तव्य ज्यान मुद्दामा गुण्डा नाइके रिगललाई बाँके जिल्ला अदालतले २०७५ वैशाखमा सर्वस्वसहित जन्मकैदको सजाय सुनाएको थियो।

भारतीले श्रीमानलाई न्यायका लागि गत बुधबारदेखि काठमाडौंको माइतीघरमा अनशन सुरू गरेकी छन्।  सर्वस्वसहित जन्मकैदको आदेश ठहर भएका तरूण दलका नेतासमेत रहेका रिगललाई आममाफी दिएपछि यसको चौतर्फी विरोध सुरू भएको छ।

सत्तापक्षकै नेताहरूले रिगललाई आममाफी दिइनु कानुन र संविधान विपरित भन्दै सच्याउन माग गरेका छन्। प्रमुख प्रतिपक्ष नेकपा एमाले, रास्वपाले रिगललाई दिएको आममाफी फिर्ता हुनुपर्ने बताएका छन्।