कोसी प्रदेश : सांसदको स्वतन्त्रतामा हस्तक्षेपको प्रयास, केदार कार्कीलाई दाबी फिर्ता गर्न लगाउने निर्णय

विराटनगर : नेपाली कांग्रेस कोसी प्रदेश कार्यसम्पादन समितिले मुख्यमन्त्रीमा व्यक्तिगत हिसाबले समर्थन गर्न पाउने सांसदको संवैधानिक स्वतन्त्रतामा हस्तक्षेपको प्रयास गरेको छ । समितिले केदार कार्कीलाई मुख्यमन्त्रीको दाबी फिर्ता गर्न लगाउने निर्णय लिएको छ । 

समितिको शुक्रबार विराटनगरमा बसेको बैठकले कार्कीसहित उनलाई समर्थन गर्ने ७ जना सांसदलाई दाबी फिर्ताका लागि आग्रह गर्ने निर्णय गरेको हो । समितिले केन्द्रीय गठबन्धनले गरेको निर्णय कार्यान्वयनका लागि संसदीय दललाई अनुरोध गरेको छ । 

केन्द्रीय गठबन्धनले नेकपा (माओवादी केन्द्र) कोसी प्रदेश संसदीय दलका नेता इन्द्रबहादुर आङ्बोलाई मुख्यमन्त्री बनाउने निर्णय लिएको थियो । तर,कांग्रेसको संस्थापनइतर अर्थात डा.शेखर कोइराला पक्षधर कार्कीले विद्रोह गरेर आफू पक्षीयसहित एमालेका सांसदको समर्थनमा बहुमत पुर्‍याएर मुख्यमन्त्रीमा दाबी गरेका छन् । 

उनको दाबीसँगै आङ्बोलाई मुख्यमन्त्री बन्न अवरोध पुगेको छ । आङ्बोले मुख्यमन्त्रीका लागि सांसदको हस्ताक्षर दुरुपयोगसमेत गरेका छन् । कार्की र उनका पक्षले दाबी फिर्ता नगर्दा आङ्बो मुख्यमन्त्री बन्न पाउँदैनन् । कार्की प्रदेशको मुख्यमन्त्री बन्नेछन् । 

प्रदेश प्रमुख पर्शुराम खापुङले संविधानको धारा १६८ को उपधारा ५ बमोजिम मुख्यमन्त्री नियुक्तिका लागि दिएको समयसीमा आज अपरान्ह ५ बजे सकिँदै छ । यो उपधारा बमोजिम जुनसुकै दलको भएपनि बहुमत पुर्‍याउनसक्ने प्रदेशसभा सदस्यलाई प्रदेश प्रमुखले मुख्यमन्त्री नियुक्त गर्न सक्ने व्यवस्था छ । सांसदलाई दलको ह्वीप लाग्दैन । कारबाही पनि हुँदैन । पद सुरक्षित रहने भएकाले संविधान अनुसार सांसदले विवेक प्रयोग गरेर आफूले चाहेकालाई मुख्यमन्त्रीमा समर्थन गर्न सक्ने छन् । 

तर, दल र गठबन्धनको निर्णय तथा पार्टी अनुशासनका नाममा संविधानले सांसदलाई दिएको स्वतन्त्रताको अधिकार हरण गर्ने प्रयास भइरहेको छ । कार्कीलाई साथ दिएका सांसदलाई समर्थन फिर्ता गराउन अनेक दबाब सिर्जना गरिएको छ । कारबाही गर्नेसम्मको धम्की दिने काम भइरहेको छ । 

सांसदको स्वतन्त्रताको अधिकार एवं उनीहरुले प्रयोग गर्ने विवेकमाथि हस्तक्षेप गर्नु संविधानविपरीत हुने कानुनका विज्ञहरु बताउँछन् । तर,सत्ता स्वार्थका लागि गठबन्धन र कांग्रेसका नाममा अनेक चालबाजी भइरहेको छ । केन्द्रबाट गठबन्धनका शीर्ष नेताको आशीर्वाद लिएर मुख्यमन्त्री सुरक्षित बनाउन खोजेका आङ्बोलाई साथ दिन कांग्रेसको संस्थापन पक्ष सक्रिय छ । 

स्रोतका अनुसार संवैधानिक र कानुनी दृष्टिकोणले सही हिसाबबाट दाबी पेस गरेका कार्कीलाई पछि हट्ने वातावरण तयार पार्न केन्द्रबाट कांग्रेसका केही नेता विराटनगरसमेत आउँदैछन् । विराटनगर आउने नेताको नाम भने स्रोतले खुलाउन चाहेन । कार्की पक्षीय एक सांसदले गठबन्धनका नाममा दबाब र प्रभावमा पार्ने तथा सांसदको स्वविवेकीय अधिकारमाथि हस्तक्षेप गर्ने काम भइरहेको बताए । 

त्यस्तै,कांग्रेसको कार्यसम्पादन समितिको बैठकले पार्टीलाई एकतावद्ध बनाउन कोसी संसदीय दललाई अनुरोध गर्ने निर्णय पनि गरेको छ । केन्द्रले थप केही निर्देशन दिए त्यसको निर्णय गर्ने अधिकार कांग्रेस प्रदेश पदाधिकारीलाई दिने निर्णय बैठकले लिएको छ ।