मन्थली जाँदै गरेको गाडी बीपी राजमार्गमा दुर्घटना : एक जनाको मृत्यु, ८ घाइते

काभ्रे : बीपी राजमार्गको धुलिखेल सुन्दर बस्तीमा मोटरसाइकल र इभी माइक्रो बस एकआपसमा ठोक्किएर दुर्घटना हुँदा एक यात्रुको मृत्यु भएको छ। बुधबार बिहान ६ : ४५ बजे काठमाडौंबाट मन्थली जाँदै गरेको बागमती प्रदेश ०३–००१ ज ०२९८ नम्बरको ईलेक्ट्रिक गाडीले ईलामतर्फ जाँदै गरेको बा ६४ प १७७२ नम्बरको मोटरसाइकललाई ठक्कर दिएको थियो।

ठक्कर दिएर भाग्ने क्रममा गाडीमा सवार रामेछापको मन्थली नगरपालिका- १२ कि २० वर्षीया रमिला बुढाथोकी घाइते भएकी थिइन्। उनको धुलिखेल अस्पतालमा उपचारको क्रममा ७:३० बजे मृत्यु भएको जिल्ला प्रहरी कार्यालय काभ्रेका डीएसपी राजकुमार श्रेष्ठले जानकारी दिए।

उनका अनुसार दुर्घटनामा गाडीमा सवार मन्थली नगरपालिका-१ की पुष्पा तामाङ, लिखु तामाकोसी गाउँपालिका- ६ का टंकप्रसाद दाहाल, मन्थली नगरपालिका- २ की ज्ञानु ढुंगेल, मन्थली नगरपालिका- १ की रकिट ढुंगेल, लिखु तामाकोसी गाउँपालिका- ६ का अनिल आलेमगर, सिन्धुली सुनकोसी गाउँपालिका -३ की उर्मिला घिमिरे घाइते भएका छन्।  मोटरसाइकल चालक ईलाम थाकथुम गाउँपालिका -३ का ४० वर्षीय रामकुमार राई ढाडमा र उनकी श्रीमती ३९ वर्षीया प्रविशा सुनुवारको देब्रे खुट्टामा चोट लागेको छ।

उनीहरुको धुलिखेल अस्पतालमा भइरहेको प्रहरीले जनाएको छ। मोटरसाइकललाई ठक्कर दिने इलेक्ट्रिक गाडीका चालक काभ्रे पनौती नगरपालिका -५ का ४१ वर्षीय उपेन्द्र थापालाई नियन्त्रणमा लिएर थप अनुसन्धान गरिहेको प्रहरीले जनाएको छ।