वीरगन्जमा अन्तर्राष्ट्रिय फुटबल प्रतियोगिता कार्त्तिक तेस्रो साता
कात्तिक २, २०८० बिहीबार ११:९:२०
वीरगन्ज : वीरगन्जमा मधेस प्रदेशकै सबैभन्दा बढी नगद राशी पुरस्कारको अन्तर्राष्ट्रिय फुटबल प्रतियोगिता आयोजना हुने भएको छ । भेट्रान सिटी क्लब वीरगन्जको आयोजनामा वीरगन्जमा कार्त्तिक १८ गतेदेखि ‘प्रथम वीरगन्ज गोल्डकप २०८०’आयोजना गर्न लागेको हो ।
प्रतियोगिताबारे जानकारी दिन बुधबार आयोजित पत्रकार सम्मेलनमा क्लबका अध्यक्ष सबिन बस्नेतले कार्त्तिक १८ देखि कात्तिक २५ गतेसम्म चल्ने प्रतियोगितामा नेपाल र भारतका गरी ८ टिमले भाग लिने जानकारी गराए ।
उनका अनुसार,प्रतियोगतामा त्रिुभवन आर्मी क्लब ,नेपाल पुलिस क्लब ,संकटा क्लब ,चर्च ब्वाइज युनाइटेड, झापा एफसी आयोजक वीरगन्ज भेट्रान सिटी क्लब तथा भारत कोलकत्ताको क्लाईभ हाउस डमडम र दिल्लीको नर्थ जोन फुटबल टिमले भाग लिने भएका हुन् ।
प्रतियोगिताको उपाधि उपविजेताले नगद ११ लाख ११ हजार १ सय ११ रुपैयाँ र उपविजेताले नगद ५ लाख ५५ हजाार ५ सय ५५ रुपैयाँ पुरस्कार पाउनेछन् । वीरगन्जमा विगत पाँच वर्षपछि अन्र्तराष्ट्रियस्तरको फुटबल प्रतियोगिता आयोजना गर्न लागिएको पत्रकार सम्मेलनमा आयोजक क्लबका महासचिव पंकज श्रेष्ठले बताए ।
उनले वीरगन्जको खेलकुद प्रर्द्धनमा संघ र प्रदेश दुवै सरकारले उपेक्षा गरिरहेको बेला वीरगन्जले पनि अन्तर्राष्ट्रियस्तरको प्रतियोगिता गर्न सक्छ भन्ने सन्देश दिन प्रतियोगता आयाोजना गर्न लागिएको बताए ।
श्रेष्ठले भने,‘वीरगन्जमा रहेको देशकै दोस्रो ठूलो नारायणी रंगशाला जीर्ण अवस्थामा छ । त्यसको जीर्णेद्वारका लागि न त संघ सरकारले न त प्रदेश सरकारले चासो लिएको छ । त्यसैले सरकारले उपेक्षा गरेपनि वीरगन्जका हामी खेलप्रेमी आफैले अन्तर्राष्ट्रियस्तरको फुटबल प्रतियोगिता गर्न सक्छौं भन्ने सन्देश दिने उद्देश्यले यो प्रतियाोगिता गर्न लागेका हौं ।’
यसका साथै कुनै समय फुटबलको हबका रुपमा चर्चित वीरगन्जमा केहि वर्ष यता फुटबल खेलप्रतिको क्रेज घट्दै गएकाले फेरी फुटबलको क्रेज बढाउनका लागि पनि प्रतियोगिता गर्न लागिएको श्रेष्ठले बताए ।
वीरगन्जको आदर्शनगर रंगशालामा हुने प्रतियोगितामा दर्शकका लागि प्रवेश शुल्क १ सय रुपैयाँ राखिएको क्लबका वरिष्ठ उपाध्यक्ष रोशन श्रेष्ठले बताए । सेमिफाइनलदेखिको खेलमा भने प्रवेश शुल्क २ सय रुपैयाँ राखिएको जानकारी उनले गराए ।
प्रतियोगिता आयोजनास्थल आदर्शनगर रंगशालाको दर्शक क्षमता १० हजार रहेकामा प्रतियोगिताकै लागि भनेर ३ हजार दर्शक बस्न सक्ने क्षमताको अस्थायी प्याराफिट पनि निर्माण गरिएको जानकारी श्रेष्ठले दिए ।
फाइनल खेलको अघिल्लोदिन कार्तिक २४ गते नेपाल र भारतको महिला फुटबल टिमबिच मैीपूर्ण खेलपनि हुने जाानकारी उनले गराए ।
प्रतियोगिताको कूल खर्च लागत ८० लाख रुपैयाँ रहेकोमा मुख्य सहयोगी वीरगन्ज महानगरपालिकाले २५ लाख रुपैयाँ दिएको क्लबका अध्यक्ष बस्नेतले बताए ।आर्थिक सहयोगका लागि अन्य प्रयोजकसँग पनि छलफल चलिरहेको उनले बताए ।
प्रतिक्रिया दिनुहोस !
