गुलरिया : घटस्थापनाको सातौ दिन बर्दियामा धुमधामले फूलपाती भित्र्याइएको छ । बर्दियाको गुलरिया नगरपालिकास्थित बगलामुखी भगवती मन्दिर तथा कोटही मन्दिरमा संयुक्त सलामी दिँदै नेपाल प्रहरी र सशस्त्र प्रहरी बल सीमा सुरक्षा कार्यालय बर्दियाले आ—आफ्ना कार्यालयका देवालयमा फूलपाती भित्र्याएका हुन् ।
शनिबार बिहान ८ बजेर २४ मिनेटमा फूलपाती एवम् तुलजा भवानीको यात्रा र स्थिरासन ९ बजेर २५ मिनेटको शुभसाइत पञ्चांग निर्णायक समितिले तोकेको थियो । सोही समयमा फुलपाती भित्र्याइएको जिल्ला प्रशासन कार्यालय बर्दियाले जनाएको छ ।
प्रमुख जिल्ला अधिकारीलगायत दुवै सुरक्षा निकायका प्रमुखले फूलपातीको विधिपूर्वक पूजा गरेका छन् । डोलीमा बोकेर ल्याइएका नवपत्रिकाहरू विधिपूर्वक पूजा गरी सुरक्षा निकायका कार्यालयमा लैजाने बर्दियामा प्रचलन छ । कदली, दाडिम, धान्य, हरिद्रा, अशोक, मानक, कर्चुर, बेल, जयन्तीलगायतका नवपत्रिका संकलन गरी सप्तमीका दिन फुलपातीका रुपमा पूजा गरिन्छ ।
शास्त्रोक्त विधि अनुसार षष्टी अर्थात फूलपातीको अघिल्लो दिन बेलको बृक्षलाई पूजा गरी निमन्त्रा दिने र फुलपातीका दिन तोकिएको साइतमा एउटै शाखामा फलेको तिनवटा बेलको फल टीप्ने मान्यता छ । यसरी संकलन गरिएका फुलपातीहरू घटस्थापना गरिएका जमरा घरमा प्रचलन अनुसार भित्र्याइने गरिन्छ । फुलपातीका दिन भित्राइएका नवपत्रिकाहरू कालरात्रीका दिन नव देवीका रुपमा पूजा गरिन्छ ।
शरदकालिय पूजा विधिमा उल्लेख गरिए अनुसार कालरात्रीको दिन मध्यरातमा कदल्यां (केरा) ब्राम्ह्णी, दाडिम (अनार) रक्तचण्डिका,धान्य (धान) लक्ष्मी,हरिद्रा (बेसार) दुर्गा, मानके चामुण्डा, बिल्बे (बेल) शिव, अशोक शोकहारिणी,जयन्ती कार्तिकी र कर्चुर कालिका देवीका रुपमा पूजा गरिन्छ ।
यसरी देवीको पूजा आराधना गर्नाले धनधान्य,यशकृतिलगायत शक्ति प्राप्त हुने मान्यता छ ।
प्रतिक्रिया दिनुहोस !
