बाँसगढी (बर्दिया) : आश्विन शुक्लपक्ष प्रतिवदा अर्थात घटस्थापनाका दिन स्थापना गरिएका माटोको देवीका मूर्तिहरु बिर्सजन गरिएको छ । दसैंका दिन मंगलबार परेकोले बुधबार मूर्ति बाजागाजा तथा भजन किर्तनसहित बिर्सजन गरिएको हो ।
बर्दियाका विभिन्न पालिकाका टोलहरुमा स्थापना गरिएका देवीका मूर्तिहरु नदी, तलाउ लगायतका जलाशयहरुमा सेलाइएको हो । बर्दियाको गुलरियास्थित बबई (भादा) नदी, कर्णाली नदी, मान खोला लगायतका जलाशयहरुमा सनातन धर्मावलम्बीहरुले मूर्ति बिर्सजन गरेको बाँसगढी नगरपालिका वडा नम्बर ५ निवासी बद्री पौडेलले बताए ।
स्थानीयहरुबाट आर्थिक संकलन गरी मूर्ति स्थापना गर्ने गरेका हुन् । बाँसगढी नगरपालिका स्थित बजार क्षेत्रमा स्थापना गरिएका मूर्तिहरु मानखोलामा बिर्सजन गरिएको उनको भनाई छ ।
नवरात्रको पहिलो दिन घटस्थापनासँगै मूर्ति स्थापना गरी नौ दिनसम्म पूजा अर्चना गरिन्छ । दैनिक दुर्गा सप्तसती पाठ, पूजा आरतीपछि नवमीको दिन हवन गरेपछि नवरात्रको पूर्णाहुती गरिन्छ ।
यसरी विधिपूर्वक गरिएको दुर्गापूजा दसैंको दिन रावण बध गरेपछि बिर्सजन गर्ने प्रचलन रही आएको छ । मंगलबार मूर्ति बिर्सजन गर्न नहुने यहाँको मान्यता छ । बर्दियाको गुलरिया स्थित भादा नदीमा मूर्ति विर्सजनका बेला ठूलो भीड हुने गर्छ । गुलरियालगायत बाँकेबाट समेत मूर्तिहरु विर्सजनका लागि आउने गरेका छन् ।
प्रतिक्रिया दिनुहोस !
