जोमसोम : उपल्लो मुस्ताङको लोघेकर दामोदरकुण्ड-१ चराङ र वारागुङ मुक्तिक्षेत्र-३ चैलेमा नेपाल विद्युत प्राधिकरणले दुई वटा अलग-अलग ३३ केभी क्षमताको सवस्टेशन निर्माण गर्ने भएको छ। लामो समयदेखि मुस्ताङमा देखिएको विद्युतीय समस्या निराकरण गर्न र कोरला नाकासम्म भरपर्दो विद्युतीय सेवा उपलब्ध गराउन सवस्टेशन निर्माण गर्न लागिएको हो।
नेपाल विद्युत प्राधिकरणका इन्जिनियर विमलराज रावतले उक्त सवस्टेशन निर्माणका लागि ठेक्का आह्वान गरिएको बताए। लागत र सवस्टेशन निर्माण गर्ने कम्पनीको कार्यदक्षता हेरेर ठेक्का सम्झौता गर्ने उनको भनाइ छ। विद्युत प्राधिकरणले सवस्टेनका लागि कामसमेत अघि बढाइसकेको छ।
प्राधिकरणले मुस्ताङको थासाङ-२ कोवाङ देखि चैले हुँदै उपल्लो मुस्ताङको लोघेकर दामोदरकुण्ड-१ चराङसम्म १०३ किमी दूरीमा ३३ केभी प्रशारणलाइन विस्तार गर्न थालेको हो।
यसका लागि प्राधिकरणले सन् २०२५ को जुलाईमा सम्पन्न गर्नेगरी ४ महिनाअघि जुलाई ६ मा ठेक्का सम्झौता गरेको थियो। २७ करोड ८६ लागतमा प्रदेशी हुलास जेभी कम्पनीले ठेक्का सम्झौता गरेको हो। यसका लागि अहिले मुस्ताङमा लाइनको पोल र तार जडानको काम भइरहेको छ।
प्रतिक्रिया दिनुहोस !
