कोसी सरकारमा माओवादी केन्द्र र नेकपा एस सहभागी हुँदै, आजै सपथ
कात्तिक १७, २०८० शुक्रबार १७:५२:५५
विराटनगर : केदार कार्की नेतृत्वको कोसी प्रदेश सरकारमा नेकपा माओवादी केन्द्र र एकीकृत समाजवादी पार्टी सहभागी हुने भएका छन्।
मुख्यमन्त्री निकट स्रोतका अनुसार माओवादी केन्द्र र नेकपा एकीकृत समाजवादीबाट एक–एक जना मन्त्री नियुक्त गर्ने तयारी भएको हो। मुख्यमन्त्री कार्कीले कांग्रेसबाट पनि थप एक जनालाई नियुक्त गर्न खोजेका छन्।
उनले कांग्रेसको संस्थागत निर्णय विरुद्ध विद्रोह गर्दै एमालेको समर्थनमा मुख्यमन्त्री नियुक्त हुँदा सहयोग गरेका रामकुमार खत्रीलाई मन्त्री बनाउन खोजेका छन्। माओवादी केन्द्र र एकीकृत समाजवादी पार्टीबाट एक–एक जना सहभागी गराउने निर्णय भइसकेको छ।
नेकपा माओवादी केन्द्र कोसी प्रदेश संसदीय दलका नेता इन्द्रबहादुर आङ्बोले गठबन्धन दलको बैठकपछि आजै मन्त्रिपरिषद् विस्तार हुने बताए। उनका अनुसार नयाँ मन्त्रीको शपथ ग्रहण पनि आजै गराउने तयारी छ।
नेकपा एमालेको समर्थनमा काँग्रेसका ८ सांसदसहित विद्रोह गरेर संविधानको धारा १६८ को ५ अनुसार २७ भदौमा मुख्यमन्त्री बनेका कार्कीले २८ भदौमा कांग्रेस विद्रोही पक्षबाट समशेर राई र एमालेबाट राम रानालाई विना विभागीय मन्त्री नियुक्त गरेका थिए। आज थप गर्ने तयारी गरेका मन्त्रीको पनि विभाग तोक्ने विषयमा सहमति भएको छैन।
कार्कीले सहमतीय सरकार बनाउन भन्दै एमालेसँग छलफल गरे पनि एमालेले माओवादी सरकारमा आए सरकारबाट बाहिरिने चेतावनी दिएको छ। कांग्रेस र माओवादी केन्द्रले एमालेबाट मन्त्री बनेका राम रानालाई बर्खास्त गर्न मुख्यमन्त्रीलाई दबाब दिएका छन्।
तर संकटमा आफूलाई साथ दिएका कारण तत्काल बर्खास्त नगर्ने मुख्यमन्त्रीको अडान छ। गठबन्धन दलका नेतासँगको छलफलमा मुख्यमन्त्री कार्कीले ढिलोचाँडो एमाले आफैं बाहिरिने भएको कारण बर्खास्त नगर्ने बताएका थिए।
स्रोतका अनुसार माओवादीबाट मोरङका गणेश उप्रेती र समाजवादीबाट पाँचथरका कमल जवेगु आज मन्त्री नियुक्त हुने सम्भावना छ।
प्रतिक्रिया दिनुहोस !
