बागलुङ : बागलुङमा जारी गण्डकी प्रदेशस्तरीय ‘बागलुङ कप’ टी-२० क्रिकेट प्रतियोगितामा दोस्रो जित निकाल्दै नवलपुर समूह विजेताको रूपमा सेमिफाइनलमा प्रवेश गरेको छ। बिहीबार आफ्नो दोस्रो खेलमा स्याङ्जालाई ४ विकेटले हराउँदै नवलपुर समूह विजेता बनेको हो।
१ सय ५ रनको विजयी लक्ष्य पछ्याएको नवलपुरले १६.२ ओभरमा ६ विकेट गुमाएर पूरा गर्यो। नवलपुरको लागि ओपनर गोविन्द विकले ३८ बलमा ५० रनको अर्धशतकीय इनिङ खेले। रविन तिमिल्सिनाले १० रन बनाए।
स्याङ्जाको लागि सन्दिप खत्रीले ३.२ ओभरमा २६ रन खर्चेर ३ विकेट लिए। आश्विनी रानाले २ विकेट लिए।
त्यसअघि बाङ्गेचौर खेल मैदानमा टस जितेर पहिले ब्याटिङ गरेको स्याङ्जाले २० ओभरमा ९ विकेट गुमाएर १ सय ४ रन बनाएको थियो। स्याङ्जाको लागि करण पंगेनीले २२ रन र अंकित न्यौपानेले १६ रन बनाए।
नवलपुरको लागि सुदिप अर्याल, कुमार राना र अपरजित पौडेलले २-२ विकटे लिएभने शिशिर भुषाल र कमल परियारले १-१ विकेट लिए। पराजित स्याङ्जा समूह उपविजेता बन्दै सेमिफाइनलमा प्रवेश गरेको छ।
बागलुङ जिल्ला क्रिकेट संघले आयोजना गरेको प्रतियोगिताअन्तर्गत शुक्रबार सेमिफाइनलका खेल हुनेछन्। पहिलो सेमिफाइनलमा समूह ए को विजेता कास्की र समूह बी को उपविजेता स्याङ्जाबीच हुनेछभने दोस्रो खेल समूह बी को विजेता नवलपुर र समूह ए को उपविजेता पर्वतबीच हुने बागलुङ जिल्ला क्रिकेट संघका सदस्य एवं प्रतियोगिताका मिडिया फोकलपर्सन अभिषेक कटुवालले बताए।
प्रतिक्रिया दिनुहोस !
