झापा : नेपाल आदिवासी जनजाति महासंघ झापाका अध्यक्ष पाण्डवलाल चौधरी मंगलबार रिहा भएका छन्। जिल्ला प्रशासन कार्यालय झापामा २० हजार रुपैयाँ धरौटी बुझाएर चौधरी ८ दिनपछि रिहा भएका हुन्। कोशी प्रदेशका मुख्यमन्त्री केदार कार्कीको गाडीमा तोडफोड गरेको आरोपमा प्रहरीले उनलाई मंसिर २६ गते राति घरबाटै पक्राउ गरेको थियो।
प्रदेश १ पुनः नामकरण संयुक्त संघर्ष समिति झापाका संयोजकसमेत रहेका उनीमाथि मुख्यमन्त्रीको गाडीमा तोडफोड गरेको भन्दै ५ लाख रुपैयाँको बिगो हालिएको थियो। अभद्र व्यवहारसम्बन्धी मुद्दा दायर गरिएका चौधरीमाथि अनुसन्धान गर्न प्रहरीले दुई पटक म्याद थपेको थियो। पहिलो पटक पाँच दिन र त्यसपछि तीन दिन म्याद थप गरिएको थियो।
८ दिनको म्याद सकिएकाले अब म्याद थप नगरी रिहा गरिएको झापा प्रहरीले जनाएको छ। कांग्रेसका महाधिवेशन प्रतिनिधिसमेत रहेका चौधरीलाई तीन दिनअघि नै रिहा गर्ने भनिएकोमा कोशी प्रदेशका मुख्यमन्त्री कार्कीका कारण उनलाई ८ दिनसम्म थुनामा राखिएको बताइएको छ।
प्रतिक्रिया दिनुहोस !
