नमोबुद्धका पूर्ववडाध्यक्ष लामाको निस्सासिएर मृत्यु, श्रीमतीको उपचार हुँदै

काभ्रे : काभ्रेको नमोबुद्ध नगरपालिका- १ का पूर्ववडा अध्यक्ष कर्मा ग्याल्बो लामाको हिटर र कोइला तापेर सुत्दा निस्सासिएर मृत्यु  भएको छ । उनको उपचारका क्रममा धुलिखेल अस्पतालमा मृत्यु भएको प्रहरीले जनाएको छ । 

सोमबार राती नमोबुद्ध नगरपालिका वडा न १ का ८२ वर्षीय पूर्ववडाध्यक्ष कर्मा ग्याल्बो लामा र उनकी ८१ वर्षीय श्रीमती असनी लामा बेलुका खाना खाइ सुतेको र बिहान अबेरसम्म नउठेपछि छोराबुहारीले  ढोका खोली हेर्दा बेहोस अवस्थामा भेटिएका थिए। त्यसपछि उनीहरूलाई उपचारका लागि अस्पताल ल्याइएको थियो ।

लामाको श्रीमतीको अस्पतालमा उपचार भइरहेको प्रहरीले जनाएको छ ।  घटनास्थलमा प्रहरी पुग्दा लामा परिवार हिटर र फलामको कोइला बालेर झ्याल ढोका बन्द गरी सुतेको आवस्थामा भेटिएको छ। लामाको उपचारको क्रममा मंगलबार बिहान १० बजे धुलिखेल अस्पतालले मृत्य घोषणा गरेको प्रहरीले जनाएको छ ।

जिल्ला प्रहरी कार्यालय काभ्रेका प्रहरी नायब उपरीक्षक राजकुमार श्रेष्ठले लामाको श्रीमतीको अवस्था सामान्य रहेको र थप उपचार भइरहेको बताए।