अन्नपूर्ण गाउँपालिकाको राष्ट्रपति रनिङ शिल्डमा प्रभा मावि च्याम्पियन
पुष १०, २०८० मंगलबार १२:१३:४३
बेनी : नारच्याङको प्रभा मावि म्याग्दीको अन्नपूर्ण गाउँपालिकाले आयोजना गरेको अन्तर विद्यालय स्तरीय चौथो राष्ट्रपति रनिङ शिल्ड खेलकुद प्रतियोगितामा च्याम्पीयन बनेको छ।
गाउँपालिकाको केन्द्र पोखरेबगरमा सोमबार सम्पन्न प्रतियोगितामा १० स्वर्ण, ५ रजत र ६ कास्य पदकसहित प्रभाले लगातार दोस्रो पटक उपाधी चुमेको हो। पहिलो राष्ट्रपति रनिङ शिल्ड प्रतियोगिताको पनि बिजेता रहेको प्रभाले दोस्रो पतियोगिता गुमाएको थियो।
दोस्रो राष्ट्रपति रनिङ शिल्डको विजेता घारको मुक्तिमार्ग मावि ८ स्वर्ण, ४ रजत र २ कास्य पदकसहित उपविजेतामा सीमित भएको छ। ६ स्वर्ण, ११ रजत र ४ कास्य पदकसहित शिख मावि तृतीय बनेको अन्नपूर्ण गाउँपालिकाका शिक्षा अधिकृत गणेशबहादुर कटुवालले बताए।
प्रतियोगिताको विजेता विद्यालयले रनिङ शिल्ड, ट्रफी, मेडल र प्रमाणपत्रसहित नगद पचास हजार पुरस्कार प्राप्त गरेको छ। दोस्रो र तेस्रो हुनेले ३० हजार र २० हजार रुपैयाँको साथमा ट्रफी, मेडल र प्रमाणपत्रद्वारा पुरस्कृत गरिएको छ।
तीन दिनसम्म सञ्चालन भएको प्रतियोगितामा ११ वटा विद्यालयका ३१५ जना खेलाडीहरुले कबड्डी, भलिबल र एथलेटिक्स विद्यातर्फ छात्र र छात्राहरुको १५-१५ इभेन्टमा प्रतिष्पर्धा भएको थियो। भलिबल, कबड्डी र एथलेटिक्सका तर्फ प्रथम हुने विद्यालयलाई पाँच-पाँच हजारका दरले नगद पुरस्कार, ट्रफी, मेडल र प्रमाणपत्र प्रदान गरिएको छ।
एथलेटिक्समा प्रभा माविका हरिस रन्तिजा र छात्रातर्फ शिख माविकी सम्झना विक, कवड्डीमा प्रभाका प्रदिप बिक र सोनिया थजाली, भलिबलमा ज्ञानप्रकाश मावि दानाका सनिस गौचन र शिख माविकी कमला पाईजालाई उत्कृष्ट खेलाडी घोषणा गरेर पुरस्कृत गरिएको थियो।
गाउँपालिकाका अध्यक्ष भारतकुमार पुन, उपाध्यक्ष दिवा तिलिजा पुन, प्रमुख प्रशासकीय अधिकृत अमृत सुवेदी, कार्यपालिकाको सामाजिक विकास समितिका संयोजक ओम फगामी, ६ नम्बर वडा अध्यक्ष रामबहादुर खड्का र वडा नम्र ४ का कार्यवाहक वडा अध्यक्ष श्याम पुर्जा लगायतले पुरस्कार वितरण गरे।
प्रतियोगिताबाट छानिएका खेलाडीहरुलाई यही पुष २० र २१ गते बेनीमा सञ्चालन हुने जिल्ला स्तरीय प्रतियोगितामा सहभागी गराइने गाउँपालिकाका अध्यक्ष पुनले बताए।
प्रतिक्रिया दिनुहोस !
