झापामा हात्तीको आक्रमणबाट फेरि एकजनाको मृत्यु, डेढ महिनामा चारजनाले गुमाए ज्यान
पुष १३, २०८० शुक्रबार ८:८:३०
झापा : झापामा जंगली हात्तीको आक्रमणबाट फेरि एकजनाको मृत्यु भएको छ । योसँगै डेढ महिनाको अवधिमा हात्तीले चारजनाको ज्यान लिइसकेको छ । मृत्यु हुनेमा शिवसताक्षी नगरपालिका– ११ स्थित सृष्टिटोल निवासी ४५ वर्षीय मेघराज राई रहेको जिल्ला प्रहरी कार्यालय झापाका डीएसपी खगेन्द्रप्रसाद रिजालले जानकारी दिए ।
शुक्रबार बिहान १ : ४५ बजेतिर हात्तीको आक्रमणबाट राईको घटनास्थलमै मृत्यु भएको डीएसपी रिजालले बताए । जङ्गलबाट आएको एउटा हात्तीले राईको टाटीको बेरा र जस्ताको छानो भएको घर भत्काई घरभित्र रहेका सामानहरू तोडफोड गरेको थियो।
घरमा हात्ती आएपछि राई छिमेकीहरूको सहयोगमा हात्ती धपाउन गएका थिए । सोही क्रममा हात्तीले राईलाई घरदेखि ५० मिटर पूर्व बाटोमा आक्रमण गरेका थिए । यता शवको कानुनी प्रक्रिया पूरा गरी पोस्टमार्टमको लागि दमक अस्पताल पठाइसकेको प्रहरीले जनाएको छ ।
यसअघि हात्तीले हल्दिबारीमा दुईजना र दमकमा एकजनाको ज्यान लिइसकेको छ।
प्रतिक्रिया दिनुहोस !
