विराटनगर : लागूऔषध र घरेलु हतियार खुकुरीसहित प्रहरीले मोरङको सुन्दरहरैँचाबाट शुक्रबार बिहान एक जनालाई पक्राउ गरेको छ।
पक्राउ पर्नेमा सुनसरीको इटहरी उपमहानगरपालिका–९ का २६ वर्षीय विवेक चौधरी रहेका छन्। अस्थायी प्रहरी पोस्ट बलियाबाट खटिएको टोलीले सुन्दरहरैँचा नगरपालिका–५ खोक्सीस्थित बूढी खोलानजिकबाट उनलाई पक्राउ गरेको मोरङ प्रहरीका प्रवक्ता डीएसपी रन्जनकुमार दाहालले जानकारी दिए।
दाहालका अनुसार चौधरीको साथबाट लागूऔषध फेनारगन ८ एम्पुल, एभिल र लुपिजेसिक ४/४ एम्पुल, नाइट्राभेट ५२ पिस र भरेको सिरिन्ज एउटा बरामद भएको छ। उनको साथमा खुकुरीसमेत भेटिएको थियो। शंका लागेर चेकजाँच गर्दा चौधरीको साथबाट लागूऔषध र खुकुरी बरामद भएको दाहालले बताए।
चौधरीलाई इलाका प्रहरी कार्यालय बेलबारीको हिरासतमा राखिएको छ। उनीविरुद्ध लागूऔषध ऐनअन्तर्गतको मुद्दा चलाउन अनुसन्धान अघि बढाइने प्रहरीको भनाइ छ।
प्रतिक्रिया दिनुहोस !
