नेप्सेमा भारी गिरावट,कारोबार रकम पनि घट्यो
काठमाडौं : साताको दोस्रो कारोबार दिन पनि सेयर बजारमा भारी गिरावट आएको छ । आइतबार सार्वजनिक बिदा रहेर सोमबारदेखि खुलेको बजारमा मंगलबार नेप्से परिसूचक ३०.०५ अंकले घटेको हो । सोमबार ८.७५ अंकले घटेको नेप्से मंगलबार १.४५ प्रतिशतले नकारात्मक रहेर २०३०.१० अंकमा कायम भयो । यस्तै सेन्सिटिभ इन्डेक्स ४.५४ अंकले घटेर ३८०.५३ अंकमा कायम भएको छ ।
कारोबार सुरु भएदेखि नै ओरालो लागेको नेप्सेले पटकपटक सुधारको प्रयास गरेपनि दिनैभर रातो देखिएको थियो । कारोबारमा आएका २ सय ५ स्क्रिप्टको सेयर मूल्य घट्दा नेप्से घटेको हो । यसदिन ३७ वटाको मूल्य बढेका छन् भने ३ स्क्रिप्टको भाउ यथावत रहे ।
बढ्नेमा सीईबीडी चिख्र्वा हाइड्रोपावर, मुक्तिनाथ कृषि कम्पनी, नेपाल वेयरहाउजिङ र लक्ष्मी लघुवित्तको सेयर अगाडि रहे । चिख्र्वाको भाउ सर्वाधिक १० प्रतिशतले बढ्यो । यस्तै सनराइज फस्र्ट म्युचुअल फन्डको इकाइ मूल्यमा ५.९ प्रतिशतको वृद्धि देखियो । यता हिमालयन हाइड्रोका लगानीकर्ताले सर्वाधिक १० प्रतिशत गुमाए । बढी भाउ घट्नेको सूचीमा सिटिजन्स लाइफ इन्स्योरेन्स, दोर्दी खोला जवि, मेगा म्युचुअल फन्ड १ अपर हेवाखोला हाइड्रोको इकाइ पनि परेका छन् ।
नेप्से घटेको दिन दिनभर ८५ हजार ४ सय ३५ कारोबारमार्फत् ३ सय ५ स्क्रिप्टका १ करोड ११ लाख ८५ हजार ७ सय १२ इकाइ सेयर ४ अर्ब ४ करोड ४६ लाख ५९ हजार ९ सय २२ रुपैयाँमा किनबेच भए । कारोबार रकम गत बिहीबारको तुलनामा ४४ करोड रुपैयाँ कम हो ।
दिनभर सबैभन्दा बढी कारोबार शिवम् सिमेन्टको भएको छ । कम्पनीको १६ करोड ११ लाखको सेयर किनबेच हुँदा कारोबार रकमका आधारमा हावथे इन्भेस्टमेन्ट, सिटिजन लाइफ, सोनापुर मिनिरल्स एन्ड आयल र एनआरएन इन्फ्रास्ट्रक्चर शीर्ष ५ मा रहे । दिनभर हाथवेको १५ करोभन्दा बढीको सेयर किनबेच भए ।
समूहगत उपसूचकतर्फ सबै समूह राताम्मे बने । तीमध्ये सबैभन्दा बढी होटल तथा पर्यटन समूहमा देखिएको छ ।