नुवाकोट : वृद्धाको हत्या गरेर फरार भएका एक जना पक्राउ परेका छन्। पक्राउ पर्नेमा शिवपुरी गाउँपालिका-६ वखतीटोलका २२ वर्षीय सुकु तामाङ रहेका छन्। शिवपुरी ६ खत्रीटोलकी ७५ वर्षिया नेत्रकुमारी घर्तीक्षेत्रीको सोमबार राति १० बजे हत्या भएको थियो।
अनुसन्धानका क्रममा घटनामा संलग्न तामाङलाई जिल्ला प्रहरी कार्यालय नुवाकोटबाट खटिएको प्रहरीको विशेष टोलीले पक्राउ गरेको हो। घटनामा संलग्न तामाङको साथबाट प्रहरीले ८३ हजार रुपैयाँसहित मृतकले कानमा लगाएको सुनको बेरुवा र पोते बिनाको तिलहरीसमेत बरामद गरेको छ।
हत्या र लुटपाट गरी फरार रहेका तामाङलाई प्रहरीले आफ्नै घरमा लुकी रहेको अवस्थामा पक्राउ गरेको हो। युवक तामाङलाई मुलुकी अपराध संहिता २०७४ बमोजिम ज्यान तथा लुटपाट सम्बन्धी कसुरमा जिल्ला अदालत नुवाकोटबाट ७ दिनको म्याद थप गरेर अनुसन्धान गरिरहेको प्रहरीले जनाएको छ।
बाख्राको खोरमा वृद्धाको शव देखेपछि छिमेकीले प्रहरीलाई खबर गरेका थिए।
प्रतिक्रिया दिनुहोस !
