सर्लाहीका विभिन्न ठाउँमा विरोध प्रदर्शन, यातायात ठप्प

मलंगवा : सर्लाहीको बरहथवामा प्रहरीको गोली लागेर एक युवकको मृत्यु भएपछि त्यसको विरोधमा सर्लाहीको विभिन्न ठाउँमा प्रदर्शन भइरहेको छ।

बरहथवामा शुक्रबार साँझ भएको प्रदर्शन नियन्त्रणमा लिन प्रहरीले बल प्रयोग गर्दा बरहथवा नगरपालिका ६ का जयशंकर साहको गोली लागेर मृत्यु भएको थियो। मृत्युको विरोधमा आक्रोशित युवाहरु शनिवार बिहानैदेखि बरहथवा, मलंगवा, सलेमपुर, कविलासी, गैार लगायतका बजारमा बिहानैदेखि विरोध प्रदर्शन गरिरहेका छन्। बाटोमा टायर बालेर प्रदर्शन गर्दा बिहानैदेखि मलंगवा नवलपुर सडकखण्डमा सवारी साधन चल्न सकेको छैन। 

बरहथवा क्षेत्रमा पनि सवारी आवागमन ठप्प नै छ। आक्रोशित स्थानीयले मृतक युवाको शव शुक्रवार साझैंदेखि घटनास्थलबाट उठाउन दिएका छैनन्। स्थानीय प्रशासनले भिडभाड तथा विरोध प्रदर्शनलाई मध्यनजर गर्दै निषेधाज्ञा जारी गरेका छन्। 

आजसम्मका लागि जारी गरिएको निषेधाज्ञा आइतबारसम्मका लागि लम्बिएको छ।  प्राथमिक स्वास्थ्य केन्द्र स्तरोउन्नतिका लागि मधेस प्रदेश सरकारलाई हस्तान्तरण गर्ने नगर कार्यपालिकाको निर्णय कार्यान्वयन गर्न माग गर्दै कांग्रेससहितका दलले गरेको प्रदर्शन उग्र बनेपछि स्थिति तनाव ग्रस्त बनेको हो। 

नगरपालिकाको कार्यालयमा ढुङ्गमुढा गरेका प्रदर्शनकारी नगरप्रमुख कल्पना कुमारी कटुवालको घरमा ढुङ्गामुढा गर्न गएपछि अवस्था झन तनावग्रस्त बनेको हो। 
नगरप्रमुख कटुवालको घरमा ढुङ्गामुढा गर्न गएपछि प्रहरीले १३ राउण्ड हवाई फायर र १९ राउण्ड अश्रुग्याँस प्रहार गरेको थियो।