सिमरा : पूर्वराजा ज्ञानेन्द्र शाह सोमबार सिमरा आएका छन्। मौसमका कारण हवाई उडान अनिश्चित बनेपछि पूर्वराजा शाह सडकमार्ग हुँदै भैरहवाबाट सिमरा आएका हुन्।
आफैंले गाडी चलाएर आएका पूर्वराजा शाहलाई सिमरास्थित प्रभु निवासमा उनका समर्थकले स्वागत गरेका थिए। परिवारसहित आएका पूर्वराजा शाहले प्रभु निवासबाहिर आफ्ना समर्थकसँग भेट गरेका थिए।
पूर्वराजालाई स्वागत गर्न विभिन्न स्थानबाट उनका समर्थक सिमरा आएका थिए। यसअघि उनको आइतबार सिमरा आउने कार्यक्रम थियो। तर, मौसमका कारण भैरहवा विमानस्थल दिनभर नखुलेपछि सिमरा यात्रा स्थगित भएको थियो।
पूर्वराजा शाहलाई स्वागत गर्न आइतबार दिउँसोदेखि नै हजारौंको संख्यामा रहेका समर्थक विमानस्थल पुगेका थिए। तर, उनको सिमरा आउने कार्यक्रम स्थगित भएपछि उनका समर्थक निराश हुँदै फर्किएका थिए।
पूर्वराजा शाहले बारा र पर्सामा हुने विभिन्न कार्यक्रममा सहभागी हुने बताइएको छ। उनको कार्यक्रमको विषयमा आधिकारिक जानकारी भने गराइएको छैन।
तस्बिर : दिवाकर भण्डारी
प्रतिक्रिया दिनुहोस !
