जाजरकोटमा एक लाख ४० हजारले लगाए दादुरा,रुवेला र टाइफाइडविरुद्धको खोप
पुष २५, २०८० बुधबार १२:४४:२३
जाजरकोट : भूकम्प प्रभावित क्षेत्रमा महामारी फैलिन नदिन सरकारले सञ्चालन गरेको दादुरा–रुवेला र टाइफाइड विरुद्धको खोप जाजरकोटमा एक लाख ४० हजार ८ सय ९१ ले लगाएका छन् । गत पुस ४ गतेदेखि १४ गते सम्म सञ्चालन गरिएको खोप अभियान अन्र्तगत ६ महिना देखि १५ वर्षसम्मका ६८ हजार ३ सय ४४ बालबालिकाले दादुरा रुवेला खोप लगाएका हुन् ।
त्यस्तै १६ देखि ४५ वर्षसम्मका ७२ हजार ५ सय ४७ जनाले टाइफाइड विरुद्धको खोप लगाएको स्वास्थ्य सेवा कार्यालय जाजरकोटका कोल्डचेन सुपरभाइजर शान्तबहादुर बुढाथोकीले बताए । उनका अनुदार दादुरा रुवेला खोप ९९ प्रतिशत र टाइफाइड ८८ प्रतिशत खोप कभरेज भएको छ । जिल्लाका ४ सय ८० खोप केन्द्रबाट खोप सञ्चालन गरिएको थियो ।
आपतकालिन अवस्थामा श्वासप्रश्वास,दूषित पिउनेपानी र विभिन्न खानेकुराबाट सर्ने रोगहरु फैलिन सक्ने जोखिमबाट बच्न सरकारले भूकम्प प्रभावित जाजरकोट,रुकुमपश्चिम लगायत आसपासका सुर्खेत,सल्यान, दैलेख, कालीकोट र जुम्ला जिल्लामा दादुरा–रुवेला र टाइफाइड विरुद्धको खोप अभियान सञ्चालन गरेको हो ।
सामान्य अवस्थामा दादुराको महामारी फैलिएमा मृत्युदर १ प्रतिशत रहने र विपदको वेला दादुराको महामारी फैलिएमा मृत्युदर ३० प्रतिशत रहने भएकोले पनि खोप अभियान संचालन गरिएको निमित्त स्वास्थ्य सेवा ब्यवस्थापक डा.प्रतिक्षा भारतीले बताइन् ।
राष्ट्रिय खोप सल्लाहकार समितिको सिफारिसमा नेपाल सरकार, स्वास्थ्य तथा जनसंख्या मन्त्रालयले भूकम्प प्रभावित र आसपासका जिल्लाहरुमा दादुरा–रुवेला र टाइफाइड विरुद्धको खोप अभियान सञ्चालन गरेको डा.भारतिले बताइन्।
गत वर्ष जाजरकोट जिल्लामा दादुराको संक्रमण देखा परेको जानकारी गराउँदै स्वास्थ्य सेवा विभाग अन्तरगत बाल स्वास्थ्य तथा खोप शाखा प्रमुख डा. अभियान गौतमले हरेक पाँच/पाँच वर्षमा दादुरा–रुवेला विरुद्धको खोप अभियान सञ्चालन गरिरहेको सरकारले भूकम्प प्रभावित र आसपासका जिल्लामा पाँच वर्ष नपुग्दै दादुरा–रुवेला र टाइफाइड विरुद्धको खोप अभियान सञ्चालन गरेको जानकारी दिए । दादुरा–रुवेला, टाइफाइड जस्ता प्रकोपहरुलाई फैलिन नदिन निश्चित गरिएका उमेर समूहका ९५ प्रतिशतले खोप लगाएको हुनुपर्ने डा.गौतमले भनाइ छ ।
स्वास्थ्य सेवा कार्यालयका अनुसार छ महिनादेखि १५ वर्षसम्मका एक लाख ५० हजार र १६ वर्षदेखि ४५ वर्षसम्मको लक्षित जनसंख्या छ लाख ५० हजार रहेको छ । जाजरकोट जिल्लामा मात्र ६ महिना देखि १५ वर्ष सम्मको लक्षित जनसंख्या ६८ हजार ९ सय १९ जना र १६ वर्षदेखि ४५ वर्षसम्मका ८६ हजार ६ सय ३६ जना रहेका छन् ।
प्रतिक्रिया दिनुहोस !
