सुडानको राजधानीमा भएको आक्रमणमा ३३ को मृत्यु
![सुडानको राजधानीमा भएको आक्रमणमा ३३ को मृत्यु](https://annapurnapost.prixacdn.net/media/albums/sudan-hamala_BgSkaRv2Gj_BZKcrbUJz2.jpg)
राजधानी खार्तुममा हवाई हमलासहित प्रतिद्वन्द्वी सुडानी सेनाहरूबिचको भिडन्तमा कम्तीमा ३३ नागरिक मारिएको प्रजातन्त्र समर्थक वकिलहरूले शुक्रबार बताएका छन्।
सेना प्रमुख अब्देल फतह अल–बुरहानले आफ्ना पूर्वसहायक एवं अर्धसैनिक कमान्डर मोहम्मद डागलोविरुद्ध करिब नौ महिना गरेको युद्धले सुडानलाई छोएको छ।
सशस्त्र द्वन्द्व स्थान र घटना डेटा परियोजनाको रूढिवादी अनुमानअनुसार युद्धमा कम्तीमा १२ हजार एक सय ९० को ज्यान गइसकेको छ। साथै संयुक्त राष्ट्रसङ्घका अनुसार युद्धबाट ७० लाखभन्दा बढी मानिस विस्थापित भएका छन्।
बिहीबार दक्षिण खार्तुमको सोबा जिल्लामा भएको हवाई बमबारीमा २३ नागरिक मारिएको र अन्य धेरै घाइते भएको आपत्कालीन वकिल समूहले आकाशमा नियन्त्रण बनाउने सेनामाथि आरोप लगाउँदै बताएको छ। वकिल समूहले दक्षिण खार्तुममा पनि तोपखाना हमलामा अन्य १० जनाको मृत्यु पुष्टि भएको जनाएको छ।
प्रतिरोध समितिका रूपमा चिनिने एक स्थानीय समूहले त्यति नै सङ्ख्यामा मृत्यु भएको सूचना दिएको थियो। उक्त समूहले भनेको थियो, 'आवासीय क्षेत्र र स्थानीय बजारमा तोपको गोलीबाट १० नागरिक मारिएका थिए।'
मध्य अप्रिलमा राजधानीमा भड्किएको युद्धको ध्यान दक्षिणतिर सरेको छ र हालै सुडानको अल–जजिरा राज्यसम्म पुगेको छ। उक्त राज्यमा हजारौं मानिसले शरण लिएका थिए।
युद्ध जारी रहेको युद्धग्रस्त राजधानीको सडकहरू डागलोको र्यापिड सपोर्ट फोर्सेज (आरएसएफ) को नियन्त्रणमा छ भने बुरहानको प्रशासनले अहिले पनि सुडानी सरकारका रूपमा वयानहरू दिने गरेको छ। आरएसएफले पश्चिमी डार्फर क्षेत्रको करिब सबै क्षेत्रमा कब्जा गरेको छ र डिसेम्बरमा अल–जजिरा राज्यमा भित्रसम्म घुसेको छ। यसबाट मुलुकका केही बचेका शरण स्थलमध्येको एकलाई नष्ट गरिएको छ।
युद्धका क्रममा सहयोग प्रदान गर्ने प्रतिरोध समितिहरूले सन् २०२१ मा बुरहान र डागलोद्वारा गरिएको विद्रोहले लोकतान्त्रिक परिवर्तनलाई हटाउनुअघि लोकतन्त्र समर्थक प्रदर्शनहरू आयोजना गरेका थिए। त्यसपछि दुवै जनरलबिच मतभेद भयो र युद्ध सुरु भयो।
द्वन्द्व सुरु भएपछि डगालोले आफ्नो पहिलो विदेश भ्रमणमा डिसेम्बरको अन्त्यसम्म धेरै अफ्रिकी राजधानीहरूको भ्रमण गरे। आदिस अबाबामा उनले सुडानका पूर्वप्रधानमन्त्री अब्दुल्ला हमदोकसँग एउटा घोषणापत्रमा हस्ताक्षर गरे। विश्लेषकहरूले यसलाइ स्वयंलाई प्रमुख वार्ताकारका रूपमा स्थापित गर्ने प्रयास भनेका छन्।
युद्धका क्रममा सेना र आरएसएफ दुवैमाथि युद्ध अपराधको आरोप लगाइएको छ। अमेरिका, साउदी अरब र हालै पूर्वी अफ्रिकी ब्लक आइजिएडीले अहिलेसम्म गरेका अन्तर्राष्ट्रिय मध्यस्थता प्रयास असफल भएका छन्। रासस
प्रतिक्रिया दिनुहोस !
![Unity](https://annapurnapost.prixacdn.net/static/assets/images/unity-logo.png)